قاشىقتان وقۋ كەزىندە وقۋشىعا ءۇي تاپسىرماسى بەرىلە مە

الماتى. قازاقپارات - وقۋشىلارعا ونلاين ءبىلىم الۋ كەزىندە ۇيگە تاپسىرما مەيلىنشە از بەرىلەدى. مۇعالىمدەر مەن وقۋشىلار تاپسىرمانى ساباق بارىسىندا ورىنداۋى ءتيىس.

بۇل تۋرالى ونلاين بريفينگ بارىسىندا الماتى قالالىق ءبىلىم باسقارماسىنىڭ جالپى ورتا ءبىلىم بەرۋ ءبولىمىنىڭ باسشىسى اقمارال ايتۋاروۆا ايتتى، دەپ حابارلايدى قازاقپارات ءتىلشىسى.

الماتى قالاسى ءبىلىم باسقارماسى جالپى ورتا ءبىلىم بەرۋ ءبولىمىنىڭ باسشىسى اقمارال ايتۋاروۆانىڭ ايتۋىنشا، ءداستۇرلى تامىز كونفەرەنسياسىندا مەكتەپ ديرەكتورلارىنا ءۇي تاپسىرماسى تۋرالى نۇسقاۋلار بەرىلدى.

« وقۋشىلارعا ءۇي تاپسىرماسى مۇلدەم بەرىلمەيدى دەگەن ءسوز جوق. تاپسىرمانىڭ كولەمى مەيىلىنشە شەكتەلەدى. نەگىزى ساباقتا ورىنداعان ءجون. بۇل وقۋشى ءۇشىن دە، مۇعالىم ءۇشىن دە ءتيىمدى دەپ شەشتىك»، - دەيدى اقمارال ايتۋاروۆا.

ونىڭ ايتۋىنشا، تامىز ايىندا 15 مىڭنان اسا مۇعالىم Kundelik.kz, Bilimland.kz, Microsoft.Teams ءبىلىم بەرۋ پلاتفورمالارىن وقۋ پروتسەسىندە قولدانۋ بويىنشا كۋرستان ءوتتى. سونىمەن قاتار ءبىلىم جانە عىلىم مينيسترلىگىنىڭ ۇسىنىسى بويىنشا قالا مەكتەپتەرىندە 19 - تامىزدا «ءبىرىڭعاي پەداگوگيكالىق كەڭەس» ءوتتى. 1 - قىركۇيەكتە 279 مەكتەپتە ونلاين رەجيمدە ءبىلىم كۇنىنە ارنالعان ساباقتار وتكىزىلدى.

اۆتور: الما مۇقانوۆا