قازاقستاندا حالىقارالىق تۋريزم جانە مەيماندوستىق ۋنيۆەرسيتەتى اشىلدى

تۇركىستان. قازاقپارات - بۇگىن ق ر تۇڭعىش پرەزيدەنتى نۇرسۇلتان نازاربايەۆتىڭ باستاماسىمەن جانە مەملەكەت باسشىسى قاسىم- جومارت توقايەۆتىڭ تاپسىرماسىمەن قۇرىلعان حالىقارالىق تۋريزم جانە مەيماندوستىق ۋنيۆەرسيتەتى سالتاناتتى جاعدايدا اشىلدى، دەپ حابارلايدى قازاقپارات ءتىلشىسى.

ورتالىق ازيانىڭ ەجەلگى تاريحي قالالارىنىڭ ءبىرى - ۇلكەن تۋريستىك الەۋەتكە يە تۇركىستاندا ورنالاسقان ۋنيۆەرسيتەتتىڭ online-فورماتتاعى اشىلۋ سالتاناتىندا مادەنيەت جانە سپورت ءمينيسترى ا. رايىمقۇلوۆا، تۇركىستان وبلىسىنىڭ اكىمى ءو. شوكەيەۆ، وزبەكستان پرەمەر- ءمينيسترىنىڭ ورىنباسارى - «جىبەك جولى» حالىقارالىق تۋريزم ۋنيۆەرسيتەتىنىڭ رەكتورى ا. ابدۋحاكيموۆ، ب ۇ ۇ جاھاندىق كوممۋنيكاتسيالار دەپارتامەنتىنىڭ وكىلى ۆ. سامەك جانە ۋنيۆەرسيتەت رەكتورى م. مۋرزامادييەۆا قۇتتىقتاۋ ءسوز سويلەدى.

شاقىرىلعان سپيكەرلەر ۋنيۆەرسيتەتتىڭ دامۋىنا، حالىقارالىق ىنتىماقتاستىق سالاسىندا قولداۋ كورسەتۋگە ۋادە بەردى.

«جاڭا ۋنيۆەرسيتەت قازاقستان رەسپۋبليكاسىندا تۋريستىك قىزمەتتى دامىتۋدىڭ مەملەكەتتىك باعدارلاماسى اياسىندا قۇرىلدى. تۋريزم جانە قوناقجايلىلىق سالاسىنداعى مامانداردى دايارلاۋ ءۇشىن قازاقستانداعى حالىقارالىق دەڭگەيدەگى العاشقى مامانداندىرىلعان ۋنيۆەرسيتەتتى اشۋدىڭ ماڭىزدىلىعىن اتاپ وتكەن ءجون. ونىڭ تۇلەكتەرى حالىقارالىق ستاندارتتىڭ قوس ديپلومىن - قازاقستاندىق جانە شەتەلدىك سەرىكتەس ۋنيۆەرسيتەتتەن الۋعا مۇمكىندىك الادى»، - دەلىنگەن مادەنيەت جانە سپورت مينيسترلىگى اقپاراتىندا.

ۆەدومستۆو مالىمەتىنشە، بىرلەسكەن ءبىلىم بەرۋ باعدارلامالارى تۋريستىك بيزنەستىڭ ناقتى قاجەتتىلىكتەرىن ەسكەرە وتىرىپ ازىرلەنەدى جانە «3 + 1» سحەماسى بويىنشا ەڭ جاقسى حالىقارالىق تاجىريبەگە نەگىزدەلگەن. وقىتۋشىلار قۇرامىنا قازاقستاندىق جانە شەتەلدىك پروفەسسورلار پۋلى، تۋريزم جانە سەرۆيس سالاسىنداعى جەتەكشى كومپانيالاردىڭ توپ- مەنەدجەرلەرى كىرەدى.

اتاپ ايتقاندا، ۋنيۆەرسيتەتتە حالىقتار دوستىعى ۋنيۆەرسيتەتىنىڭ (رەسەي)، جىبەك جولى ۋنيۆەرسيتەتىنىڭ (وزبەكستان)، سونداي- اق تۇركيا، گرۋزيا، شۆەيتساريا ۋنيۆەرسيتەتتەرىنىڭ پروفەسسورلارىن تارتۋ تۋرالى كەلىسىمشارتتارى بار. مۇنىڭ ءبارى ۋنيۆەرسيتەت ستۋدەنتتەرىنە جوعارى دەڭگەيدەگى تەوريالىق ءبىلىم الۋعا جانە شەتەلدىك تاجىريبەدەن وتۋگە، سونىڭ ىشىندە ب ۇ ۇ دۇنيەجۇزىلىك تۋريزم ۇيىمىندا (UNWTO) قولداۋ كورسەتۋگە مۇمكىندىك بەرەدى.

اۆتور: مارلان جيەمباي