ءبىرقاتار جوعارى وقۋ ورىندارىنىڭ ليتسەنزياسى ۋاقىتشا توقتاتىلدى – ب ع م

نۇر-سۇلتان. قازاقپارات – ق ر ءبىلىم جانە عىلىم مينيسترلىگى بىرنەشە جوعارى وقۋ ورنىنىڭ ءبىلىم بەرۋ ليتسەنزياسىنىڭ كۇشىن توقتاتتى.

بۇل شەشىمگە ءبىرقاتار جوعارى وقۋ ورنىن قايتا تەكسەرۋ بارىسىندا ءبىلىم تۋرالى زاڭناما نورمالارىنىڭ بۇزىلۋى نەگىز بولدى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

«الماتى» ۋنيۆەرسيتەتى، «قاينار» اكادەمياسى، الماتى ەكونوميكا جانە ستاتيستيكا اكادەمياسى، قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى، ا. قۋاتبەكوۆ اتىنداعى حالىقتار دوستىعى ۋنيۆەرسيتەتى جانە «Silkway» حالىقارالىق ۋنيۆەرسيتەتىن قايتا تەكسەرۋ قورىتىندىسى بويىنشا ءبىلىم بەرۋ سالاسىنداعى زاڭناما نورمالارىنىڭ بۇزىلۋى قايتا انىقتالدى.

وسىعان بايلانىستى ق ر ب ع م ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى «الماتى» ۋنيۆەرسيتەتى، الماتى ەكونوميكا جانە ستاتيستيكا اكادەمياسى، قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى، ا. قۋاتبەكوۆ اتىنداعى حالىقتار دوستىعى ۋنيۆەرسيتەتى انىقتالعان بۇزۋشىلىقتار جويىلعانعا دەيىن ليتسەنزياسىنىڭ كۇشىن توقتاتتى.

«قاينار» اكادەمياسى مەن «Silkway» حالىقارالىق ۋنيۆەرسيتەتىنىڭ ءىسى تەكسەرۋ قورىتىندىسىنا شاعىمدانۋىنا بايلانىستى سوتتا قارالۋدا.

سوت پروتسەسى اياقتالعاننان كەيىن ءتيىستى شارالار قابىلدانادى. سونىمەن قاتار م. ح. دۋلاتي اتىنداعى تاراز وڭىرلىك ۋنيۆەرسيتەتىندە «قۇقىق» دايارلاۋ باعىتى بويىنشا (باكالاۆريات) ليتسەنزياعا قوسىمشانىڭ قولدانىلۋى توقتاتىلدى.

وسى رەتتە تالاپكەرلەردى زاڭناماعا سايكەس ءبىلىم بەرۋ قىزمەتىن جۇرگىزۋگە ليتسەنزيانىڭ قولدانىلۋى توقتاتىلعان جاعدايدا جوعارى وقۋ ورنى جاڭا 2020-2021 وقۋ جىلىنا قابىلداي المايتىندىعىنا نازار اۋدارۋلارىن سۇرايمىز.