اقمولا وبلىسىندا مامونتتىڭ سۇيەگى تابىلدى

كوكشەتاۋ. قازاقپارات - اقمولا وبلىسىنىڭ بۇلاندى اۋدانىندا مامونتتىڭ سۇيەگى تابىلدى، دەپ حابارلايدى قازاقپارات ءتىلشىسى وبلىستىق تاريحي- مادەني مۇرانى قورعاۋ جانە پايدالانۋ ورتالىعىنا سىلتەمە جاساپ.

ورتالىق ماماندارىنىڭ مالىمەتىنشە، مامونتتىڭ سۇيەگى نوۆوبراتسك اۋىلدىق وكرۋگىنە قاراستى بۋدەننوۆكا اۋىلىنىڭ ماڭىنان اعىپ وتەتىن ارشالى وزەنىنىڭ جاعاسىنان تابىلعان. ونى وسى اۋىلدىڭ جەرگىلىكتى تۇرعىنى ۆالەري دۋبوۆيك كەزدەيسوق تاۋىپ الىپ، كەيىن ءتيىستى ورگاندارعا حابارلاعان.

مامونتتىڭ سۇيەگى تابىلعان جەرگە وبلىستىق تاريحي-مادەني مۇرانى قورعاۋ جانە پايدالانۋ ورتالىعىنىڭ ديرەكتورى سەرىك ىسقاقوۆ پەن ماماندارى باردى.

«ەلىمىزدەگى ەپيدەميولوگيالىق جاعدايعا، COVID-19 كوروناۆيرۋستىق ينفەكسياسىنىڭ تارالۋىنا جانە كارانتيندىك رەجيمنىڭ ەنگىزىلۋىنە، ءتۇرلى ءىس-شارالاردى وتكىزۋگە تىيىم سالىنۋىنا بايلانىستى، ورتالىق تابىلعان مامونت سۇيەگىن ودان ءارى تەرەڭ زەرتتەۋگە قازاقستان ۇلتتىق مۋزەيىنىڭ عالىمدارىن شاقىرا وتىرىپ، وسى جەردە ارحەولوگيالىق قازبا جۇمىستارىن جۇرگىزۋ ءۇشىن 2021 -جىلعى جوسپارعا ەنگىزۋ مىندەتىن العا قويىپ وتىر»، - دەيدى سەرىك ىسقاقوۆ.

وبلىستىق تاريحي-مادەني مۇرانى قورعاۋ جانە پايدالانۋ ورتالىق ماماندارى اتاپ وتكەندەي، كەزدەيسوق ولجا عالىمدار مەن زەرتتەۋشىلەرگە، عىلىمي- زەرتتەۋ پروتسەسىندە قىزىقتى بولىپ، جانۋارلاردىڭ تىرشىلىك ەتۋ ورتاسىن كەشەندى زەرتتەۋگە مۇمكىندىك بەرەدى دەپ وتىر.

ەسكە سالا وتسەك، وسىعان دەيىن الىپ جانۋارلار سۇيەكتەرى زەرەندى، شورتاندى، جاقسى، سەلينوگراد اۋداندارىندا تابىلعان بولاتىن. بۇل جولى تابىلعان سۇيەك وسىدان 10 مىڭ جىل بۇرىن ءومىر سۇرگەن مامونتتىڭ سۇيەگى بولۋى مۇمكىن. ونىڭ ۇزىندىعى 1,5 مەتردى قۇرايدى. قالىڭدىعى 30 س م جاقسى ساقتالعان. قازىرگى تاڭدا، اتالمىش مامونتتىڭ سۇيەگى دايەكتى ءارى ەگجەي- تەگجەيلى زەرتتەۋ ءۇشىن اقمولا وبلىستىق تاريحي-ولكەتانۋ مۋزەيىنە تاپسىرىلدى.

اۆتور: اسلان وسپانوۆ