قازاقستان پرەزيدەنتى تۇرىك جازۋشىسىن «دوستىق» وردەنىمەن ماراپاتتادى
سايتتاعى اقپاراتتارعا قاراعاندا، ءىس-شارا بارىسىندا قازاقستاننىڭ تۇركياداعى ەلشىسى ابزال ساپاربەك ۇلى م. اۋەزوۆتىڭ «اباي جولى» رومانىن جاقىندا تۇرىك تىلىنە اۋدارعان بەلگىلى تۇرىك اقىنى، جازۋشى زافەر كيبارعا قازاقستان رەسپۋبليكاسى پرەزيدەنتىنىڭ جارلىعىنا سايكەس بەرىلگەن قازاقستاننىڭ مەملەكەتتىك ناگراداسى - II دارەجەلى «دوستىق» وردەنىن تابىستادى.
ءوز كەزەگىندە ز. كيبار تابىستالعان وردەن ءۇشىن پرەزيدەنت قاسىم-جومارت توقايەۆقا، قازاق حالقىنا العىسىن ءبىلدىرىپ، ابايدىڭ بارشا ادامزاتتى اعارتار تەرەڭ سوزدەردى جاي ايتىپ قانا قويماي، قاعاز بەتىنە ءتۇسىرىپ، وشپەس مۇرا قىلىپ كەتكەنى جايلى ءسوز قوزعادى.
ءىس-شارانىڭ اشىلۋىندا ءسوز سويلەگەن ا. ساپاربەك ۇلى ۇلى اقىننىڭ قازاق حالقى ءۇشىن ەرەكشە ءرولىن ايتىپ، «ابايدى تانۋ - ءوزىمىزدى تانۋ» دەپ، ونىڭ تەرەڭ ويلارىنىڭ قازاق بولمىسىن قالىپتاستىرعانىن اتاپ ءوتتى.
قازاقستاندىق ديپلومات ابايدىڭ ادەبيەتپەن قاتار قوعامدىق ومىردەگى جاڭاشىل ويلارى وزىنەن كەيىنگى قازاق زيالىلارى ءۇشىن ونەگەلى ۇلگىگە اينالعانىن ايتتى.
تۇركيا مادەنيەت ەكس-ءمينيسترى نامىك زەيبەك ءوز سوزىندە ابايعا قازىرگى قازاق ادەبيەتىنىڭ نەگىزىن قالاۋشىسى دەگەن باعا بەرىپ، ۇلى اقىننىڭ بۇكىل تۇركى الەمى ءۇشىن ماڭىزىنا توقتالدى.
شارا ۇلى اقىننىڭ ولەڭدەرى، پوەمالارى مەن قارا سوزدەرىن مانەرلەپ وقۋعا ارنالعان ادەبي كەشكە ۇلاستى. سونداي-اق، اباي قۇنانباي ۇلىنىڭ سۋرەتتەرىنەن قۇرالعان كورمە سالتاناتتى ءىس-شارا قاتىسۋشىلارىنا ۇسىنىلدى.
القالى جيىنعا ت ر مادەنيەت ەكس-ءمينيسترى نامىك زەيبەك، ەۋرازيا جازۋشىلار وداعىنىڭ پرەزيدەنتى ياكۋپ ومەروعلۋ، سونداي-اق جەرگىلىكتى زيالى قاۋىم جانە انكاراداعى ديپلوماتيالىق ميسسيالاردىڭ، بۇقارالىق اقپارات قۇرالدارىنىڭ وكىلدەرى مەن تۇركيادا ءبىلىم الىپ جاتقان قازاقستاندىق جاستار جانە ت. ب. قاتىستى.
