كوروناۆيرۋستىڭ ەكىنشى تولقىنى ءبىرشاما جەڭىل وتەدى – ەپيدەميولوگ
«كوروناۆيرۋس ىندەتىنىڭ نەگىزگى تولقىنىن وتكىزدىك» دەگەن پىكىردەگى ادامدارمەن كەلىسەمىن. بىزدە نەگىزگى تولقىن وسى جىلدىڭ ماۋسىم- شىلدە ايلارىندا بولدى. مۇنى بىزگە قولجەتىمدى ستاتيستيكاعا، اۋرۋحاناعا جاتقىزۋ دەرەكتەرىنە قاراپ ايتا الامىز. دەگەنمەن، تىركەلگەن ستاتيستيكالىق مالىمەتتەر شىنايى جاعدايدى كورسەتە المايدى. مەنىڭشە، مۇنداي جايت بۇكىل الەمدە بىردەي. كوكتەمدە ناۋقاستاردى تىركەگەن كەزدە جەڭىل جانە سيمپتومسىز فورماسىنا، ورتاشا اۋىر جانە اۋىر فورماسىنا قاتىستى مۇلدە باسقا ارا قاتىناستى بايقاعان ەدىك. بۇعان قوسا، ورتاشا جانە اۋىر فورمامەن اۋىرعانداردىڭ سانى باسىم بولدى. كوروناۆيرۋسقا شالدىعۋدىڭ شىرقاۋ شەگىنەن وتكەنىمىزدى بىلدىرەتىن تاعى ءبىر جايت - وكپە قابىنۋىنىڭ وتە كوپ بولۋى. ونىڭ ۇستىنە قازىر دەنساۋلىق ساقتاۋ مينيسترلىگى بۇل وكپە قابىنۋلارىن كوۆيد دەپ ساناپ، تىركەۋگە قوسىپ وتىر. ياعني، وكپە قابىنۋىلارى پ ت ر- دياگنوستيكالاۋ كومەگىمەن انىقتالعان ەدى»، - دەدى ول كوروناۆيرۋستىڭ ەكىنشى تولقىنىڭ ءجۇرۋ مۇمكىندىگىن تالقىلاۋعا ارنالعان ونلاين جيىندا.
ونىڭ اتاپ وتۋىنشە، كوروناۆيرۋس ىندەتىنىڭ شىرقاۋ شەگىنەن ءوتىپ كەتۋىمىز الداعى ۋاقىتتاعى جاعدايعا وڭ اسەرىن تيگىزەدى.
«ويتكەنى، ەندى يممۋنيتەتتىڭ بار ەكەندىگىن بىلەمىز. كوروناۆيرۋستى قايتالاپ جۇقتىرىپ الۋ دەرەكتەرى بىرەن- ساران عانا. ونىڭ ءوزى دە اعزانىڭ ەرەكشەلىگىنە، يممۋنيتەتتىڭ قالىپتاسۋىنا بايلانىستى. جالپى، يممۋنيتەت بار. وسىنى ەسكەرەر بولساق، كوروناۆيرۋستىڭ ەكىنشى تولقىنى ءبىرشاما جايداق وتەدى. ياعني، ماۋسىم- شىلدەدەگىدەي كۇرت ورشىمەيدى. ءبىز دە، دەنساۋلىق ساقتاۋ مينيسترلىگى دە، جالپى قوعام دا دايىن بولادى. جەلتوقسانعا قاراي ول كۇردەلەنە تۇسەدى. قىركۇيەك پەن قازان ايلارى ءبىرشاما تىنىش وتەدى»، - دەدى باۋىرجان ءجۇسىپوۆ.
اۆتور: مارلان جيەمباي
