اقتوبەدە كوپقاباتتى ءۇيدىڭ قابىرعالارىنا اباي بەينەلەنگەن مۋرالدار سالىندى
اقتوبە قالاسى اباي داڭعىلى بويىنداعى كوپقاباتتى ءۇيدىڭ قابىرعاسىنا اقىننىڭ سۋرەتى سالىندى. بۇل سۋرەتشى تولەگەن داربايەۆتىڭ تۋىندىسى. قاجەتتى قۇرال-جابدىققا جەرگىلىكتى كاسىپكەرلەر قارجى ءبولدى.
«ابايدىڭ بەينەسىن سالۋ - ۇلكەن جاۋاپكەرشىلىك. ءۇيدىڭ قابىرعاسىندا سۋرەت 10 جىل بويى سىرى كەتپەي تۇراتىنىنا كەپىلدىك بەرەمىن. بۇل سۋرەتكە 40 ماۋسىمعا شىداس بەرەتىن ارنايى سيليكون بوياۋ قولدانىلدى»، - دەيدى سۋرەتشى.
تولەگەن داربايەۆ بۇعان دەيىن «باتىر جىرى» سۋرەتىن، ءاليا - مانشۇك بەينەلەرىن ۇيلەردىڭ قابىرعاسىنا سالدى. وسىلايشا، ول قالانىڭ كوركىن كەلتىرۋگە ۇلەس قوسىپ ءجۇر.
ايتا كەتەيىك، اباي داڭعىلىندا بۇعان دەيىن 45 قارا ءسوز جازىلعان تاقتا ورناتىلىپ، شاعىن كىتاپ قويىلدى. كىشى ساۋلەت نىسانىندا ءبىر شۋماق ولەڭ جازىلعان. بۇل دەمەۋشىلەردىڭ تارتۋى بولدى. ءارى داڭعىلداعى سۋبۇرقاق جوندەلىپ، ىسكە قوسىلدى.
اۆتور: التىناي ساعىندىقوۆا
