رەسپۋبليكالىق اباي وقۋلارى بايقاۋى وتەدى
ونلاين فورماتتا وتەتىن اباي وقۋلارىنىڭ نەگىزگى ماقساتى - قازاق حالقىنىڭ ادەبي مۇراسىن ناسيحاتتاۋ، وقۋشىلاردىڭ كلاسسيكالىق قازاق ادەبيەتىن وقۋعا قىزىعۋشىلىعىن ارتتىرۋ، اباي مەن شاكارىم شىعارماشىلىعىن ناسيحاتتاۋ، وقۋشىلاردىڭ ەستەتيكالىق تالعامىن، شىعارماشىلىق قابىلەتتەرىن دامىتۋ، ۇلى اقىنداردىڭ پوەزياسىنا، رۋحاني مۇراسىنا دەگەن سۇيىسپەنشىلىككە تاربيەلەۋ.
ەرەجەگە سايكەس، اباي وقۋلارى ءۇش كەزەڭدە وتكىزىلەدى: اۋداندىق (قالالىق) ، وبلىستىق جانە رەسپۋبليكالىق. اباي وقۋلارىنىڭ اۋداندىق كەزەڭىنە 13625 وقۋشى، وبلىستىق كەزەڭگە 1759 وقۋشى قاتىستى. رەسپۋبليكالىق قورىتىندى كەزەڭگە 120 وقۋشى قاتىسادى دەپ كۇتىلۋدە. اباي وقۋلارىنىڭ رەسپۋبليكالىق كەزەڭى 6 نوميناتسيادان تۇرادى:
1 نوميناتسيا - «ولەڭ - ءسوزدىڭ پاتشاسى، ءسوز ساراسى» نوميناتسياسى - اباي ولەڭدەرىن جاتقا وقۋ كونكۋرسى.
2 نوميناتسيا - «ابايدىڭ قارا سوزدەرى» نوميناتسياسى بويىنشا ابايدىڭ قارا سوزدەرىن جاتقا، مانەرلەپ وقۋ.
3 نوميناتسيا - «ابايدىڭ اقىن شاكىرتتەرىنىڭ شىعارمالارى» نوميناتسياسى بويىنشا شاكەرىم قۇدايبەردى ۇلى، اقىلباي اباي ۇلى، ماعاۋيا اباي ۇلى شىعارمالارىن جاتقا وقۋ.
4 نوميناتسيا - «كوڭىلىم ءاندى ۇعادى» نوميناتسياسى - وقۋشىنىڭ اباي مەن شاكارىمنىڭ اندەرى مەن كۇيلەرىن ورىنداۋ شەبەرلىگى باعالانادى.
5 نوميناتسيا - «جۇيرىكتەن جۇيرىك وزار جارىسقاندا» نوميناتسياسى - وقۋشىلاردىڭ ءوز شىعارمالارى (پوەزيالىق) باعالانادى.
6 نوميناتسيا - « ۇلىلار الەمى» اباي مەن شاكارىمنىڭ شىعارماشىلىعىنا، رۋحاني بولمىسىنا قاتىستى تاقىرىپقا ەسسە جازۋ. ايتا كەتەرلىگى، قاتىسۋشىلار اقىنداردىڭ بارلىق شىعارمالارىن جاتقا ءبىلۋى كەرەك.
اباي وقۋلارىنىڭ جەڭىمپازدارى مەن جۇلدەگەرلەرى ق ر ءبىلىم جانە عىلىم مينيسترلىگىنىڭ I ، II ، Ⅲدارەجەلى ديپلومدارىمەن، سونداي- اق «دارىن» رەسپۋبليكالىق عىلىمي- پراكتيكالىق ورتالىعىنىڭ گراموتالارىمەن جانە باعالى سىيلىقتارىمەن ماراپاتتالادى.
