رۋمىنيادا قازاقستاننىڭ مادەني كۇندەرى باستالدى

نۇر- سۇلتان. قازاقپارات - رۋمىنيانىڭ كلۋج- ناپوكا قالاسىندا قازاقستاننىڭ مادەني كۇندەرىنىڭ اشىلۋ سالتاناتى ءوتتى.

بۇل جايىندا قازاقستاننىڭ رۋمىنياداعى ەلشىلىگىنىڭ Facebook پاراقشاسىندا جاريالاندى، دەپ حابارلايدى قازاقپارات ءتىلشىسى.

تامىزدىڭ 21-23 - كۇندەرى وتەتىن مادەني كۇندەردىڭ اشىلۋىندا ءسوز سويلەگەن قازاقستان ەلشىسى نۇرباح رۇستەموۆ ەلىمىزدىڭ تاريحى مەن ءداستۇرى، اسىرەسە قازاقتىڭ ۇلى اقىنى اباي سىندى تانىمال تۇلعالارى جايىندا كەڭىنەن اڭگىمەلەپ بەردى.

«مادەني كۇندەردى ۇيىمداستىرۋ رۋمىن جۇرتشىلىعىنا ەلىمىزدىڭ مادەنيەتى، ءداستۇرى مەن باي تاريحى جايىندا كوبىرەك بىلۋگە مۇمكىندىك بەرەدى. سونىمەن قاتار اباي شىعارمالارى ەكى حالىقتىڭ ماڭىزدى بايلانىسىنا اينالا الادى» ، - دەپ اتاپ ءوتتى ەلشى.

مادەني كۇندەر اياسىندا رۋمىنيادا تۇرىپ جاتقان قازاقتىڭ تانىمال جاس سۋرەتشىسى الۋا تەبەنوۆانىڭ كورمەسى اشىلدى. مۇنان بولەك، رۋمىن جۇرتشىلىعى قازاق حالقىنىڭ باستان كەشىرگەن تاريحي وقيعالارى جايىندا سىر شەرتەتىن «قازاق حاندىعى. التىق تاق» ، «شىڭىراۋ» جانە «قۇنانباي» فيلمدەرىن تاماشالايدى. مادەني باعدارلامانىڭ ماڭىزدى ەلەمەنتى 23- امىزدا وتەتىن شوۋ بولماق. ابايدىڭ 175 جىلدىق مەرەيتويىنا ارنالعان شوۋ بارىسىندا رۋمىن كامەرالىق وركەسترى قازاقتىڭ ۇلى اقىنىڭ تانىمال شىعارمالارىن ورىندايدى.