اسحات ايماعامبەتوۆ اۋىل مۇعالىمدەرىنە جالاقى تولەۋ جۇيەسىن جاڭارتۋعا ۋادە بەردى

نۇر- سۇلتان. قازاقپارات - اۋىلدىق مەكتەپتە جۇمىس ىستەيتىن مۇعالىمدەرگە جالاقى تولەۋ جۇيەسى جاڭارتىلادى. بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

«بۇگىنگى كۇنى شاعىن جيناقتالعان نەمەسە شالعايداعى مەكتەپتەرىمىزدىڭ ءبىلىم بەرۋ ساپاسى تومەن. سونىڭ ەڭ باستى پروبلەماسىنىڭ ءبىرى - بۇل، ارينە، ۇستازداردىڭ، مامانداردىڭ جەتىسپەۋشىلىگى. مىسالى، كوپ مەكتەپتە ءبىر مۇعالىم 4-5 پاننەن بەرەدى. سوندىقتان ساپا ماسەلەسى وتە ماڭىزدى بولىپ تۇراتىندىعى بەلگىلى. بۇل پروبلەمانى شەشۋ ءۇشىن اۋىلدىق مەكتەپتەردى قارجىلاندىرۋ، اۋىلدىق مەكتەپتە جۇمىس ىستەيتىن مۇعالىمدەرگە جالاقى تولەۋ جۇيەسىن جاڭارتۋ بويىنشا جۇمىس جۇرگىزۋ قاجەت»، - دەدى مينيستر پەداگوگتار مەن ءبىلىم جانە عىلىم سالاسى قىزمەتكەرلەرىنىڭ رەسپۋبليكالىق تامىز كەڭەسى بارىسىندا.

ونىڭ اتاپ وتۋىنشە، مينيسترلىك بۇل تۇيتكىلدى شەشۋ ءۇشىن ناقتى جۇمىستاردى قولعا العان. «قازىر اۋىلدىق مەكتەپتەردە جۇمىس ىستەيتىن ۇستازدارعا جالاقى تولەۋ جۇيەسىن جاڭارتۋ بويىنشا جۇمىستى باستاپ جاتىرمىز. بيىلعى وقۋ جىلىندا وسى جۇمىستى اياقتايمىز دەپ سانايمىن»، - دەدى اسحات ايماعامبەتوۆ.

اۆتور: مارلان جيەمباي