اباي وقۋلارىنىڭ جەڭىمپازدارى انىقتالدى
2017 - جىلدان باستاپ ۇيىمداستىرىلىپ كەلە جاتقان اتالمىش كىتاپحانانىڭ بۇل ءداستۇرى قوعام اراسىندا اباي مۇراسىن ناسيحاتتاۋدى، ەل ازاماتتارىنىڭ وقۋ مادەنيەتىن، ادەبي تالعامىن قالىپتاستىرۋدى كوزدەيدى. ەلباسى كىتاپحاناسىنىڭ ديرەكتورى، پروفەسسور ءامىرحان راحىمجانوۆتىڭ سوزىنشە، زامان وزگەرىپ، قوعامدىق سانادا كۇرت ساپىرىلىستار تۋعان سايىن ابايدىڭ مۇراسى جاڭا قىردان جارقىراي اشىلىپ، قادىرىن ارتتىرا تۇسپەك.
داناگوي اقىننىڭ شىعارماشىلىعىن جاڭعىرتۋدا ەلباسى كىتاپحاناسى اباي وقۋلارىن ۇيىمداستىرۋدى يگى داستۇرگە اينالدىرىپ قانا قويماي، جاستاردىڭ وقۋعا قۇشتارلىعىن وياتىپ، ومىرلىك كوزقاراسىن كەڭەيتۋ ماقساتىندا بيىل «اباي - 175» جوباسىن ىسكە قوستى. ويشىلدىڭ ءپالساپالىق مۇراسى ارنايى باعدارلامامەن ازىرلەنگەن سەمينار- ترەنينگتەر مەن بىلىكتىلىك دارىستەرىنىڭ ارقاۋىنا اينالدى. رەسمي سايتتاعى ەلەكتروندى كاتالوگتىڭ كومەگىمەن مەكەمە اباي ەڭبەكتەرىنە قولجەتىمدىكتى ىسكە اسىردى.
ويشىلدىڭ تۋعان كۇنىنە وراي ەلباسى كىتاپحاناسى اقىننىڭ رۋحى مەن شىعارماشىلىعىنا ارناپ كورمەلەر مەن ءتۇرلى ءىس- شارالاردى ۇيىمداستىرۋدى دا ادەتكە اينالدىرعان. 2016 -جىلى كىتاپحانا ءارحيۆىنىڭ قىزمەتكەرلەرى شىعىس قازاقستان وبلىسىنداعى جيدەباي اۋىلىنا ساپارمەن بارىپ، سەمەي قالاسىنداعى تاريح جانە ولكەتانۋ مۋزەيىنەن، قۇجاتتاۋ ورتالىعىنان، اباي اتىنداعى امبەباپ كىتاپحانادان اقپارات جيناپ، تىڭ دەرەكتەرمەن قوردى تولىقتىردى. بۇگىندە اباي وقۋلارى ەلىمىزدىڭ ءتۇرلى ايماقتارىنان قولعابىس تاۋىپ وتىر.
ءۇش جىلدىڭ ىشىندە ماراپاتتاۋ راسىمىنە قاتىسىپ ۇلگەرگەن بەلگىلى ابايتانۋشىلار، مەملەكەت جانە قوعام قايراتكەرلەرى، عىلىم جانە مادەنيەت سالاسىنىڭ سىيلى وكىلدەرى بۇل شارانىڭ ماڭىزدىلىعىن اتاپ كورسەتىپ وتىردى. بيىلعى بايقاۋدا قازىلار القاسىنىڭ شەشىمىمەن جۇلدەلى ورىندار مەن نوميناتسيالارعا يە بولعاندار:
1 - ورىن - نۇر- سۇلتان قالاسىنىڭ №2 كوپبەيىندى اۋرۋحاناسى مەديتسينا قىزمەتكەرلەرىنىڭ ۇجىمى؛ Ⅱ ورىن - سەمەي قالاسىنداعى فيزيكا- ماتەماتيكا باعىتىنداعى نازاربايەۆ زياتكەرلىك مەكتەبىنىڭ 11 - سىنىپ وقۋشىسى السانا سمايلوۆا؛
Ⅲ ورىن - جامبىل وبلىسى، قورداي اۋدانى، سورتوبە اۋىلىنداعى ورتا مەكتەپتىڭ 3 سىنىپ وقۋشىسى كاريما ليۋشانلو؛
«اباي مۇراسىن ناسيحاتتاۋشى» نوميناتسياسى - الماتى وبلىسى، ەڭبەكشى قازاق اۋدانىنىڭ ەسىك قالاسىنداعى ۆ. تەرەشكوۆا اتىنداعى ورتا مەكتەپتىڭ 2- سىنىپ وقۋشىسى يۋسۋف شيرينوۆ.
ال «ەڭ كىشكەنتاي ۇمىتكەر» نوميناتسياسىندا جەڭىستى قانجىعاسىنا بايلاعان پاۆلودار وبلىسى، ەكىباستۇز قالاسىنىڭ №24 «اينالايىن» بالاباقشاسىنىڭ تاربيەلەنۋشىسى جىگەر حاسەن جۇرتتىڭ كوزايىمىنا اينالدى.
- اناممەن بىرگە اباي اتامىزدىڭ ولەڭدەرىن ءسۇيىپ وقيمىز. سايىستىڭ ۇيىمداستىرىلىپ جاتقانىن بىلگەن بويدا اناما قاتىساتىنىمدى ايتىپ، ۇزاق دايىندالدىم. كورەرمەندەر مەن قازىلار القاسىنىڭ باعاسىنا ريزاشىلىعىمدى بىلدىرەمىن. سايىسقا قاتىسۋ وتە ۇنادى، وعان كەلەر جىلى دا ۇلەسىمدى قوسۋعا ۋادە بەرەمىن، - دەيدى جىگەردىڭ ءوزى.
- جىگەردىڭ ولەڭ وقۋعا قۇشتارلىعى 3 جاسىندا وياندى. اباي شىعارماشىلىعىنا قۇرمەتى دە ەرتە قالىپتاسقان. ونىڭ ولەڭدەرىن جاتتاۋعا كەلگەندە، مەكتەپ باعدارلاماسىنداعى قىسقا ۇزىندىلەردى جاراتپاي، تولىق نۇسقاسىن جاتتاعاندى ۇناتادى. ولەڭنىڭ ءانى بولسا، شىرقاپ ورىنداعاندى ءجون سانايدى. بالا تۇسىنىگىنە قيىنداۋ سوزدەر مەن ۇعىمداردىڭ ءمانىن ىلعي سۇراپ ويىنا ءتۇيىپ جۇرەدى. 7-8 ولەڭىن جاتتاعان شاعىندا ول ابايدىڭ قارا سوزدەرىنە كوشتى. قىزىعى، سىڭارى جىبەككە قاراعاندا، جىگەردىڭ ويلاۋ قابىلەتى وزگەشە، اعالىعى ءبىلىنىپ تۇرادى. ومىرگە كوزقاراسى، اقىل- پاراساتى اباي مۇراسىنىڭ ارقاسىندا قالىپتاستى دەسەك ارتىق بولمايدى. وسى تۇستا وسكەلەڭ ۇرپاقتى تاربيەلەۋ ىسىنە ۇلەس قوسىپ جاتقان ەلباسى كىتاپحاناسىنا العىسىمىز شەكسىز، - دەيدى جىگەر حاسەننىڭ اناسى مەرۋەرت ورازالينا.
- اباي مۇراسى - قازاق حالقىنىڭ اسىل قازىناسى. ۇلى ويشىلدىڭ قالامىنان تامعان ولەڭ جولدارىن ءتورت جاسار بالانىڭ اۋزىنان ەستىگەندە كوكىرەكتى ەرىكسىز ماقتانىش سەزىمى كەرنەپ، بويدى وسكەلەڭ ۇرپاققا دەگەن ريزاشىلىق سەزىمى بيلەيدى. ادەبيەت ەستافەتاسىندا كوپتىڭ كوزىنە ءتۇسىپ، دارىنىمەن ەرەكشەلەنگەن قاتىسۋشىلار جىلدا ماراپاتتالعانىمەن، بۇل سايىستا جەڭىلگەندەر بولمايدى. سەبەبى اباي مۇراسىن دارىپتەۋدى مىندەت تۇتقان بايقاۋدىڭ ءار قاتىسۋشىسى سول ماقساتتى جۇزەگە اسىرىپ، ماڭىزدى ءىستىڭ ورىندالۋىنا سەپتىگىن تيگىزەدى. بۇل - ورتاق جەڭىس، - دەيدى كىتاپحانا ديرەكتورى ءامىرحان راحىمجانوۆ.
ءداستۇرلى سايىسقا ەلىمىزدىڭ تۇكپىر- تۇكپىرىنەن، الىس- جاقىن شەتەلدەن كەلىپ تۇسەتىن ءوتىنىمنىڭ سانى جىلدان جىلعا ارتىپ كەلەدى. تۇساۋى كەسىلگەن ساتتەن باستاپ اباي وقۋلارىنا 1000-نان استام ادام قاتىسقان. توپ جارعان جەڭىمپازدارعا العىس حاتتار مەن سىيلىقتار تاپسىرىلماق.
