كوروناۆيرۋسپەن ەكىنشى رەت اۋىرۋدىڭ سالدارى قانداي بولماق
بۇل ساۋالدارعا نۇر- سۇلتان قالالىق كوپبەيىندى №1 اۋرۋحاناسى باس دارىگەرىنىڭ مىندەتىن اتقارۋشى مارات ءابدۋوۆ جاۋاپ بەردى، دەپ حابارلايدى قازاقپارات ءتىلشىسى.
«كوروناۆيرۋس ىندەتىنە قايتا شالدىعۋ اۋرۋدىڭ ءوتۋ بارىسىن كۇردەلەندىرىپ جىبەرەدى. قانت ديابەتى جانە وزگە دە سوزىلمالى جاناما اۋرۋلارمەن تۇسەتىن ناۋقاستاردا كوروناۆيرۋس وتە اۋىر جۇرەدى. دەگەنمەن، ءبىز ۇلكەن تاجىريبە جيناپ الدىق. ءىس جۇزىندە بارلىق ناۋقاستى ەمدەپ شىعارۋعا بولادى»، - دەدى ول.
سونىمەن قاتار ول كوروناۆيرۋس ىندەتىمەن قايتادان ستاتسيونار كومەگىنە جۇگىنگەن ناۋقاستار جايىندا ايتىپ بەردى.
«كوروناۆيرۋستىق وكپە قابۋىنان جازىلىپ شىققاننان كەيىن ءبىر نەمەسە ەكى اپتادان كەيىن ولار قايتادان اسقىنۋلارمەن ءتۇسىپ جاتادى. ءبىراق، ولاردىڭ بەلگىلەرى باسقا بولادى. بۇل رەتتە ناۋقاستىڭ جاسى مەن جاناما اۋرۋلارىن ەسكەرگەن ءجون. بۇكىل حالىق ءۇشىن بۇل جاعداي وڭايعا سوقپاعانىن تۇسىنەمىز. ۇزاققا سوزىلعان كارانتين كەزەڭى كوپشىلىككە ۇنامايدى، ادامدار نارازىلىق تا تانىتىپ جاتادى. دەگەنمەن، ءبىز وزىمىزگە عانا ەمەس توڭىرەگىمىزدەگى ادامدارعا دا قامقورلىق تانىتا ءبىلۋىمىز قاجەت. كارانتيننىڭ كەزەڭ- كەزەڭىمەن الىنىپ تاستالۋى بارلىق شەكتەۋ شارالارىنىڭ جويىلعاندىعىن بىلدىرمەيدى. بۇقارالىق شارالارعا، وتباسىلىق توي- تومالاققا بارماعان ءجون. ماسكا رەجيمىن ساقتاۋ قاجەت»، - دەدى مارات ءابدۋوۆ.
اۆتور: مارلان جيەمباي
