اقتاۋدا پاراشيۋتى اشىلماي قالعان اسكەري قىزمەتشى اۋىر جاعدايدا جاتىر

نۇر- سۇلتان. قازاقپارات - ماڭعىستاۋ وبلىسىندا جاۋىنگەرلىك دايارلىق بارىسىندا اسكەري قىزمەتشىلەردىڭ ءبىرىنىڭ پاراشيۋتى اشىلماي قالدى. سارباز اۋىر جاعدايدا اۋرۋحانادا جاتىر.

بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.

«2020 -جىلعى 5 - تامىزدا اقتاۋ قالاسىندا ۇشۋ قۇرامى پاراشيۋتپەن سەكىرۋدى ورىنداۋ بارىسىندا اسكەري قىزمەتشىلەردىڭ بىرىندە پاراشيۋت تولىق اشىلمادى. جەردەن بەرىلگەن كوماندالارعا پاراشيۋتشى جاۋاپ بەرمەدى. قوسالقى پاراشيۋتتى پايدالانباۋ سالدارىنان جەرگە قاتتى ءتۇستى»، - دەلىنگەن مينيسترلىك اقپاراتىندا.

ۆەدومستۆو مالىمەتىنشە، زارداپ شەككەن اسكەري قىزمەتشىگە العاشقى مەديتسينالىق كومەك كورسەتىلىپ، اقتاۋ قالاسىنىڭ مەديتسينالىق مەكەمەسىنە جەدەل جەتكىزىلگەن.

«8- تامىز كۇنى دارىگەرلەر حيرۋرگيالىق وپەراتسيا جاسادى. اسكەري قىزمەتشىنىڭ جاعدايى اۋىر. پاراشيۋتپەن سەكىرۋ قولايلى مەتەورولوگيالىق جاعدايلاردا جاۋىنگەرلىك دايارلىق جوسپارىنا سايكەس ورىندالدى. اسكەري قىزمەتشىلەرمەن سەكىرۋدى ورىنداۋ الدىندا قاۋىپسىزدىك شارالارىن ساقتاۋ بويىنشا نۇسقاۋلىق وتكىزىلدى. وقيعانىڭ سەبەپتەرىن انىقتاۋ بويىنشا قىزمەتتىك تەرگەۋ باستالدى»، - دەپ اتاپ وتەدى قورعانىس مينيسترلىگىنەن.

اۆتور: مارلان جيەمباي