اتىراۋعا رەسەيدەگى قازاقتاردان گۋمانيتارلىق كومەك كەلدى
اتىراۋلىق ۆولونتەر نازگۇل ناجىكەنوۆانىڭ ءمالىم ەتۋىنشە، گۋمانيتارلىق كومەك استراحان وبلىسىنداعى «جولداستىق» قازاق مادەنيەتى» قوعامدىق بىرلەستىگىنىڭ ءتوراعاسى نۇرلان قاندىقوۆ پەن «قازاق مادەنيەتىن دامىتۋ» قورىنىڭ ءتوراعاسى ەدۋارد ىسقاقوۆتىڭ باستاماسىمەن جينالعان.
كورشى ەلدەگى قانداستار اتىراۋداعى اۋرۋحانامەن بايلانىس جاساپ، قاجەتتى مەديكامەنتتەر ءتىزىمىن العان.
«بۇگىن اتىراۋ وبلىستىق كارديولوگيالىق ورتالىققا 20 مىڭ مەديتسينالىق ماسكا، 500 ليتر جەزينفەكتسيالىق سۇيىقتىق، 1 مىڭ ينفۋزيوندىق سيستەما، 1 مىڭ مەديتسينالىق داكە، 300 قورعانىش كوستيۋمى، ءتۇرلى مەديكامەنتتەردى تاپسىردىق»، - دەدى ۆولونتەر نازگۇل ناجىكەنوۆا. ونىڭ ايتۋىنشا، كورشى ەلدەگى قانداستارىمىزدىڭ باستاماسىنا استراحان وبلىسىنىڭ گۋبەرناتورى يگور بابۋشكين قولداۋ بىلدىرگەن.
بۇل يگىلىكتى ىسكە استراحانداعى چەشەن قوعامداستىعىنىڭ مۇشەلەرى دە اتسالىسقان.
ەسكە سالا كەتەلىك، بۇدان بۇرىن اتىراۋعا قىتاي مەن ۆەتنامنان گۋمانيتارلىق كومەك كەلگەن ەدى.
