سەنبە جۇرتقا، تۇرسا دا قانشا ماقتاپ: بريتان جازۋشىسى ابايدىڭ ولەڭىن جاتقا وقىدى
جازۋشىنىڭ ۆيدەوسىن قازاقستاننىڭ ۇلى بريتانياداعى ەلشىلىگى Twitter پاراقشاسىندا جاريالادى. «ءبىز اباي ولەڭدەرىن وقۋ ەستافەتاسىن قۋانا قولداپ وتىرمىز. 10-تامىز - ۇلى اقىننىڭ تۋعان كۇنى قارساڭىندا ءبىز كۇن سايىن اباي ولەڭدەرىنەن ءۇزىندى وقىعان بريتاندىق جانە يرلانديالىق دوستارىمىزدىڭ ۆيدەوسىن جاريالاپ وتىرامىز» دەپ جازادى قازاقستان ەلشىلىگى.
اقىن شىعارمالارىن اعىلشىن تىلىنە بريتان اقىنى، سىنشى، دراماتۋرگ، توماس ەليوت سىيلىعىنىڭ لاۋرەاتى، پروفەسسور شون و'برايەن اۋدارعان. بۇل جىر جولدارى جىل سوڭىنا دەيىن تاريحتا ءبىرىنشى رەت ءبىر تومدىق كىتاپ بولىپ جارىق كورەدى.
«مەن 2013 -جىلدان بەرى قازاقستانداعى وقۋلىقتاردى جەتىلدىرۋ ىسىنە جانە باسقا دا قىزىقتى جوبالارعا بەلسەنە اتسالىسىپ ءجۇرمىن. قازاقستاندى جانە ونىڭ حالقىن ەرەكشە جاقسى كورەمىن. مەن قازىر ابايدىڭ ماقتانگەرشىلىك تۋرالى ولەڭىنەن ءۇزىندى وقىپ بەرەمىن» دەيدى كريس ماكناب ۆيدەوعا كىرىسپەسىندە.
ول ابايدىڭ «سەنبە جۇرتقا، تۇرسا دا قانشا ماقتاپ» ولەڭىنەن ەكى شۋماقتى جاتقا ايتىپ بەردى.
