حالىققا قىزمەت كورسەتۋ ورتالىعىنا قاتىستى كوپتەگەن شاعىمدار تۇسۋدە - اگەنتتىك

نۇر-سۇلتان. قازاقپارات - بۇگىن مونيتورينگ توپ ەلورداداعى مامانداندىرىلعان حالىققا قىزمەت كورسەتۋ ورتالىعىنىڭ كارانتين جاعدايىنداعى جۇمىسىمەن تانىستى.

ونىڭ قۇرامىنا ق ر سىبايلاس جەمقورلىققا قارسى ءىس-قيمىل اگەنتتىگى مەن ىشكى ىستەر ورگاندارى وكىلدەرى كىرگەن، دەپ حابارلايدى قازاقپارات ءتىلشىسى.

«بىزگە الەۋمەتتىك جەلىلەر ارقىلى ازاماتتاردان حالىققا قىزمەت كورسەتۋ ورتالىعىنىڭ قىزمەتىنە قاتىستى كوپتەگەن شاعىمدار كەلىپ ءتۇسىپ جاتىر. ءوز كەزەگىمىزدە ءبىز بۇل ماسەلەنى تالداپ، ءتيىستى شارا قولداناتىن بولامىز. بۇگىن نۇر-سۇلتان قالاسىنداعى مامانداندىرىلعان حالىققا قىزمەت كورسەتۋ ورتالىعىنىڭ جۇمىسى بارىسىمەن تانىسۋعا ارنايى كەلىپ وتىرمىز. جالپى الاتىن بولساق، بۇل ءبىزدىڭ اگەنتتىكتىڭ قۇزىرەتىنە كىرمەيتىن مىندەت. دەگەنمەن ادامداردان شاعىم كەلىپ تۇسكەندىكتەن، حالىق ۇنىنە قۇلاق اسىپ مونيتورينگ جۇرگىزىپ جاتىرمىز»، - دەدى ق ر سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى ولجاس بەكتەنوۆ. ونىڭ ايتۋىنشا، ح ق ك و-داعى بۇگىنگى ماسەلە كەزەكتى ونلاين برونداۋ مەن قىزمەت الۋعا قاتىستى بولىپ وتىر.

«بۇل ماسەلەنى ۇلتتىق اقپاراتتىق تەحنولوگيالار باسشىلىعىمەن بىرلەسىپ شەشەمىز. ياعني 3 تامىزعا دەيىن ح ق ك و- داعى كەزەكتى برونداۋ پروبلەماسى ءبىرجاقتى بولادى. وسى تۇرعىدا قۇزىرەتتى ورگانداردىڭ جۇمىسىنداعى كەمشىلىكتىڭ بارىن ايتىپ وتكەن ءجون، ءبىز ونى جاسىرمايمىز. حالىققا قىزمەت كورسەتۋ ورتالىعى قىزمەتىندەگى تاعى ءبىر كەدەرگى الىپساتارلاردىڭ پروبلەماسى. نەگىزى الىپساتارلاردىڭ ماسەلەسىمەن قۇقىق قورعاۋ ورگاندارى اينالىسۋى ءتيىس، سەبەبى ول سىبايلاس جەمقورلىق ارەكەتىنە جاتپايدى»، - دەدى ول.

اگەنتتىك ءتوراعاسى ورىنباسارىنىڭ پىكىرىنشە، مەملەكەتتىك قىزمەت كورسەتۋدىڭ ساپاسىن ارتتىرۋ ءۇشىن قوعامدىق باقىلاۋدى كۇشەيتۋ كەرەك.

اۆتور: ءالي يبرايەۆ