قازاقستاننىڭ ەكى ءوڭىرى كوروناۆيرۋستىڭ ەكىنشى تولقىنىنا دايىندالىپ جاتىر
ماماندار ارقانى كەڭگە سالۋعا ءالى دە ەرتە ەكەنىن ايتادى. سەبەبى، پاندەميانىڭ ەكىنشى كەزەڭى باس كوتەرگەندە اق حالاتتىلار ساقاداي ساي بولۋعا ءتيىس. باسقارما وكىلدەرىنىڭ ايتۋىنشا، قالادا پنيەۆمونيا مەن جرۆي دەندەگەندە بىرىنەن سوڭ ءبىرى اشىلعان ستاتسيونارلىق ورىندار ازىرگە جابىلمايدى. ولار كەلەسى كەزەڭگە رەزەرۆ رەتىندە الىنادى.
دەنساۋلىق ساقتاۋ سالاسىنىڭ وكىلدەرى الداعى ۋاقىتتا ناۋقاستاردىڭ ۇيدە جاتىپ ەمدەلۋىنە باسىمدىق بەرمەك. ەمحانالار جانىنان قۇرىلعان قوسىمشا ءموبيلدى بريگادالار سانى قازىر 197 گە جەتكەن. وسىعان دەيىن ولار 16 مىڭعا جۋىق ناۋقاسقا كومەك كورسەتىپتى.
«تۇرعىندار ونلاين كەڭەستەر الا الادى. وندا دارىگەرلەر ەمدەلۋ جولدارىن قاشىقتان ءتۇسىندىرىپ بەرەدى. بۇل ادامداردىڭ شوعىرلانۋىن بولدىرمايدى. بۇل دا ءوز كەزەگىندە اۋرۋدى تەزىرەك جەڭۋگە سەپ بولماق»، - دەيدى شىمكەنت قالاسى دەنساۋلىق ساقتاۋ باسقارماسىنىڭ جەتەكشى مامانى داۋلەت شورابايەۆ.
شىمكەنتتىك اق حالاتتىلار پەندەميانىڭ ەكىنشى تولقىنى قاشان باستالاتىنىن ءدوپ باسىپ ايتا المادى. بۇل حالىقتىڭ سانيتارلىق جاعدايدى قانشالىقتى ەسكەرۋىنە بايلانىستى ەكەن. سالاعا جاۋاپتىلار قازىر ەكى ايلىق ءدارى- دارمەك قورىن دا جاساقتاپ، ءتيىستى تاپسىرىستارىن دا الدەن- اق قامداپ قويىپتى.
سونىمەن قاتار، كوروناۆيرۋستىڭ ەكىنشى تولقىنىنا سولتۇسىك قازاقستان وبلىسىنداعى مەديتسينالىق مەكەمەلەر دە دايىندالىپ جاتىر. بۇل تۋرالى پەتروپاۆلوۆسك.news حابارلايدى.
ءوڭىر باسشىسى قۇمار اقساقالوۆ 250 جاساندى تىنىس الدىرۋ اپپاراتىن ساتىپ الۋ جوسپارلانىپ وتىرعانىن ايتتى.
«ءبىز كوروناۆيرۋستىڭ ەكىنشى تولقىنىنا دايىندالىپ جاتىرمىز. بولجام بويىنشا، ول بيىل كۇزدە بولادى. بىزدە ناۋقاستاردى ەمدەۋ بارىسىندا جاساندى تىنىس الدىرۋ اپپاراتتارىنىڭ جەتىسپەۋشىلىگى جوق بولعانىمەن، ۆيرۋس جۇقتىرعانداردىڭ سانى ۇلعايادى دەپ ويلاپ وتىرمىز. سوندىقتان ءبىز دايىن بولۋىمىز كەرەك»، - دەيدى ول.
