قازاقستاندىق وقۋشىلار فيزيكادان ەۋروپالىق وليمپيادادا جۇلدەلى ورىنعا يە بولدى

نۇر-سۇلتان. قازاقپارات - قازاقستاننىڭ قۇراما كومانداسى فيزيكا پانىنەن وتكەن ەۋروپالىق وليمپياداعا قاتىستى، دەپ حابارلايدى قازاقپارات ب ع م باسپا ءسوز قىزمەتىنە سىلتەمە جاساپ.

ەۋروپالىق فيزيكالىق وليمپيادا (IPhO - International Physics Olympiad) - بۇل دارىندى وقۋشىلارعا ارنالعان فيزيكا پانىنەن وتەتىن حالىقارالىق ايماقتىق وليمپيادا.

جارىس قاشىقتان ونلاين ءوتتى. وليمپياداعا الەمنىڭ 50 دەن استام ەلىنەن 250 وقۋشى قاتىستى.

تۋرنيرگە قازاقستاننىڭ اتىنان 5 ۇمىتكەر - 2019-جىلعى رەسپۋبليكالىق وليمپيادانىڭ جەڭىمپازدارى مەن جۇلدەگەرلەرى، فيزيكا پانىنەن وليمپيادا رەزەرۆىنىڭ مۇشەلەرى قاتىستى.

وليمپيادا قورىتىندىسى بويىنشا قازاقستاندىق قۇرامانىڭ قورجىنىندا ءبىر التىن، ەكى كۇمىس جانە ءبىر قولا مەدال بار.

جەڭىمپازدار مەن جۇلدەگەرلەر - سەمەي قالاسىنداعى شىعىس قازاقستان وبلىستىق مامانداندىرىلعان «ءبىلىم يننوۆاتسيا» ليتسەيىنىڭ وقۋشىسى راسۋل ماعاۋين - التىن مەدال؛ انتون دراگانچۋك (پاۆلودار قالاسىنداعى دارىندى بالالارعا ارنالعان 8№ مەكتەپ- ليتسەيى) - كۇمىس مەدال؛ راۋان قالدىبايەۆ (نۇر-سۇلتان قالاسىنداعى رەسپۋبليكالىق فيزيكا-ماتەماتيكا مەكتەبى) - كۇمىس مەدال؛ ميراس قوبىلان (پاۆلودار قالاسىنداعى دارىندى بالالارعا ارنالعان 8№ مەكتەپ- ليتسەيى) - قولا مەدال.

الماتى قالاسىنداعى رەسپۋبليكالىق فيزيكا-ماتەماتيكا مەكتەبىنىڭ وقۋشىسى الەكسەي يانچەنكو گراموتامەن ماراپاتتالدى.