اتىراۋ وبلىسىندا تۇزدى كولگە بارۋعا تىيىم سالىندى

اتىراۋ. قازاقپارات - اتىراۋ وبلىسىنىڭ يندەر اۋدانىنداعى تۇزدى كول مەن جاساندى كارەرلەرگە بارۋعا ۋاقىتشا تىيىم سالىندى. بۇل تۋرالى اۋداندىق اكىمدىك اقپارات تاراتتى، لەپ حابارلايدى قازاقپارات.

«اتىراۋ وبلىسىنىڭ باس مەملەكەتتىك سانيتاريالىق دارىگەرىنىڭ قاۋلىسىنا سايكەس، دەمالۋشىلاردىڭ شامادان تىس جينالۋىنا بايلانىستى 28-شىلدەدەن باستاپ يندەر اۋدانىنىڭ اۋماعىنداعى تۇزدى كولگە جانە جاساندى كارەرلەرگە بارۋعا ۋاقىتشا تىيىم سالىنادى»، دەلىنگەن اقپاراتتا.

بۇل كول اۋدان ورتالىعى - يندەربور كەنتىنەن 12, ال، «يندەر- قاراباۋ» تاس جولىنان 1,5 شاقىرىم قاشىقتا ورنالاسقان. مامانداردىڭ ايتۋىنا قاراعاندا، كول جىل سايىن جەر استى سۋلارىمەن اعىپ كەلەتىن 1,5 ميلليون توننا تۇزدى ەرىتىندىمەن تولىعادى. سۋ قۇرامىندا 22 ءتۇرلى حيميالىق ەلەمەنت بار. تەرەڭدىگى 50 مەتردەن اسادى. جالپى اۋماعى 110,5 شارشى شاقىرىمدى، ۇزىندىعى 40 كيلومەتردى قۇرايدى.

«بۇل كولدىڭ اتىن ايگىلەگەن ءارى پايدالىسى - تۇزدى سۋ. ونىڭ قۇرامىندا 22 ءتۇرلى ميكروەلەمەنت بار. ەڭ باعالىسى - بور، كالي، بروم، ماگني. سونىڭ ىشىندە بور - وتە سيرەك كەزدەسەتىن ەلەمەنت. ونى اتوم ەنەرگەتيكاسىندا دا قولدانادى»، - دەيدى ق ر ۇلتتىق عىلىم اكادەمياسىنىڭ اكادەميگى مۇفتاح دياروۆ. ەسكە سالا كەتەلىك، بۇدان بۇرىن اتىراۋ وبلىسىندا كارانتين 3-تامىزعا دەيىن سوزىلعان ەدى.