كونديتسيونەرى بار بولمەدە دە ۆيرۋس جۇقتىرۋ ىقتيمالدىعى جوعارى

الماتى. قازاقپارات - الماتى فتيزيوپۋلمونولوگيا ورتالىعىنىڭ جۇقپالى اۋرۋلار ءبولىمىنىڭ مەڭگەرۋشىسى، فتيزيوحيرۋرگ، پۋلمونولوگ ابزال مالباسقانوۆ كوروناۆيرۋسقا قاتىستى ونلاين سۇحبات وتكىزدى، دەپ حابارلايدى قازاقپارات ءتىلشىسى.

مامان حالىق اراسىندا تارالعان وتىرىك- شىنى ارالاس گيپوتەزالارعا دا تۇسىنىك بەردى. «كونديتسيونەر ۇنەمى جەدەل وتكىر ۆيرۋستىق رەسپيراتورلى اۋرۋعا شالدىققان، سۋىق تيگەن ادامنىڭ جاعدايىن ودان ءارى اسقىندىرۋى مۇمكىن فاكتورعا جاتادى. كوشەدە، وفيستە، كولىكتە 35-40 گرادۋس ىستىق بولعان جاعدايدا، ادامدار سالقىنداۋ ءۇشىن كونديتسيونەر ورناتادى. ىستىقتاپ كەلىپ، سالقىن عيماراتتا سالقىنداعان ادام قايتادان ىستىققا شىققاندا، ادام اعزاسىندا تەمپەراتۋرا اۋىتقيدى. بۇل يممۋنيتەتتىڭ السىرەۋىنە اكەلۋى مۇمكىن»، - دەدى ا. مالباسقانوۆ.

ونىڭ ايتۋىنشا، ادام ءتۇرلى ينفەكتسيانى جۇقتىرماۋ ءۇشىن كونديتسيونەر ءفيلترىن ۋاقىتىندا اۋىستىرىپ تۇرۋى ءتيىس. بولمە تابيعي جولمەن جەلدەتىلىپ تۇرسا - ەڭ ابزالى بولماق. «كونديتسيونەر قوسقاندا ءبىز ەسىك تەرەزەنى جاۋىپ جۇرەمىز. اپپارات ءبىر بولمەدەگى اۋانى عانا الماستىرادى. سوندىقتان، كونديتسيونەرى بار بولمەدە دە ۆيرۋس جۇقتىرۋ ىقتيمالدىعى جوعارى. اسىرەسە فيلترى اۋىسپاعان جاعدايدا. سەبەبى، ەسكى فيلتر كلەبسيەللا، لەگيونەللا باكتەريالارىن تاراتۋى مۇمكىن. ولار لاس جەردە وسەتىن ميكروورگانيزمدەر. بۇل باكتەريالار دا پنيەۆمونياعا اكەلەدى»، - دەدى ول.

اۆتور: گۇلميرا عوسمانالي