امەريكالىقتار اسىراپ العان قازاق بالاسى پاۆلودارداعى باۋىرلارىن تاپتى
«جاقسى جاڭالىق - بالا كەزىندە قازاقستاننان اسىراپ الىنعان تايلەر بلوتتەر (تالعات) تۋعان باۋىرلارىمەن قاۋىشتى. وعان ەرقانات تاسىبايەۆ كومەكتەسىپ، بىرنەشە ساعاتتا پاۆلودارداعى وتباسىن تاۋىپ بەردى. جارايسىڭ، ەرقانات!»، - دەپ حابارلاندى Facebook جەلىسىندەگى قازاقستاندىق- امەريكالىق قاۋىمداستىق پاراقشاسىندا.
تايلەر (تالعات) بلوتتەردى كىشكەنتاي كەزىندە امەريكالىقتار قازاقستانداعى بالالار ۇيىنەن اسىراپ العان جانە ميچيگان شتاتىنا الىپ كەتكەن. تايلەر جاڭا وتباسىنان كوپ نارسەنى ۇيرەنگەنىن، ءبىراق ءوز كەلبەتىنىڭ وتباسىنا ۇقسامايتىنىن، سول ءۇشىن قاتارلاستارىنىڭ مازاعىنا ۇشىراعانىن جازدى.
«ءوزىمنىڭ كىم ەكەنىمدى، قانداي وتباسىدان شىققانىمدى بىلمەگەنىم ءۇشىن، اينالامدارعى ادامداردان ەرەكشە بولعانىم ءۇشىن جىلايتىن ەدىم. ءوزىمدى ءوزىم باعالامادىم. قازىر مۇنداي ويلارمەن كۇرەسىپ كەلەمىن. مەكتەپتە وقىپ جۇرگەندە ءوز وتباسىم، باۋىرلارىم تۋرالى كوپ ويلايتىنمىن. «قانداي ەكەن؟ « دەپ ويشا ەلەستەتەتىنمىن»، - دەپ جازدى تايلەر (تالعات) بلوتتەر ءوزىنىڭ Facebook پاراقشاسىندا.
ورتا مەكتەپتى بىتىرگەن سوڭ تايلەر (تالعات) لاس- ۆەگاس قالاسىنا كوشىپ، سوندا ءبىلىم العان جانە جۇمىس ىستەگەن. 2020 -جىلى كارانتين باستالعاندا ءوز وتباسىن ىزدەپ تابۋدى ماقسات ەتىپ قويعان.
«تۋعان انامنىڭ تەگىنە ۇقساس بارلىق ادامدارعا حابارلاما جىبەردىم. «ءسىز مەنى تانىمايسىز. ءبىراق، مىنا ايەلدى بىلەسىز بە؟» دەگەن سىڭايدا حات جازدىم. ماعان ەشكىم جاۋاپ بەرمەدى. تەك ءبىر ادام قول ۇشىن سوزىپ، مەنى جەلىدەگى قازاقستاندىق- امەريكالىق قاۋىمداستىق پاراقشاسىنا قوستى، وسى پاراقشاعا ءوز وقيعاڭدى جاز دەدى. 2020 -جىلدىڭ 24- شىلدەسىندە تۇسكى 1 دە ءوز وقيعامدى بايانداپ، پوست شىعارعان ەدىم. ساناۋلى ساعاتتا- اق تەلەفونىما حابارلاما تولىپ قالدى. كوپتەگەن قازاقتار ماعان كومەكتەسكىسى كەلدى. سول كۇنى كەشكى 5 تە ءبىر ادام قازاقستاندا مەملەكەتتىك قىزمەتتە ىستەيتىن دوستارى بار ەكەنىن، سولار ارقىلى ىزدەپ كورەتىنىن جازدى. ال كەشكى 8 دە «سەنىڭ وتباسىڭ تابىلدى» دەپ حابارلاستى. مەن، ارينە، سەنگەن جوقپىن. ءتىپتى نە ويلارىمدى بىلمەدىم»، - دەيدى كەيىپكەر. وسىلايشا تايلەر قازاقستانداعى اپكەسىمەن جانە باۋىرلارىمەن بەينەبايلانىس ارقىلى سويلەسكەن.
«ولار مەنى 16 جىل بويى ىزدەپتى. بالالار ءۇيى مەن تۋرالى ەش اقپارات بەرمەگەن. ولاردىڭ ەش حابارى بولماعان. 16 جىل وتكەن سوڭ بيولوگيالىق وتباسىممەن بايلانىسىپ وتىرمىن. بۇل جازبانى دا ماقتانعاننان ەمەس، قاتتى تولقىعاننان جازىپ وتىرمىن»، - دەيدى تايلەر (تالعات) بلوتتەر.
