بۋرابايدا كارانتين كەزىندە ءتيىن مەن قۇستاردىڭ سانى ارتقان

بۋراباي. قازاقپارات - بۋراباي دەمالىس ورنىندا كارانتين ۋاقىتىندا ءتيىن جانە قۇستاردىڭ سانى كوبەيگەن. بۇل تۋرالى «بۋراباي» مەملەكەتتىك تابيعي ۇلتتىق پاركىنىڭ ديرەكتورى سەرگەي بىكوۆ ءمالىم ەتتى، دەپ حابارلايدى قازاقپارات ءتىلشىسى.

«ءبىزدىڭ ازاماتتاردىڭ ەكولوگيالىق مادەنيەتى ورتاشادان تومەن. بىزگە كەلۋشىلەردىڭ اراسىندا دەمالىستان سوڭ قوقىستى جيناپ، تازالاپ كەتەتىندەر بار، وكىنىشكە قاراي ءىشىپ- جەپ، سول جەرگە تاستاپ كەتەتىندەر دە كەزدەسەدى. ال كەي ادامدار قوقىستى كولىكتىڭ تەرەزەسىنەن لاقتىرا سالادى. جانە بۇل پروبلەما تەك قانا كول جاعالاۋىندا عانا ەمەس»، - دەيدى س. بىكوۆ. ونىڭ ايتۋىنشا، سوڭعى 15-20 جىل كولەمىندە بۋرابايدا دەمالۋشىلاردىڭ سانى ارتقان.

«مۇندا دەمالۋشىلاردىڭ سانى ونداعان، جۇزدەگەن ەسەگە دەيىن ارتتى. ەگەر 1990 -جىلدارى جىلىنا 10-20 مىڭ دەمالۋشى كەلسە، وتكەن اپتانىڭ وزىندە 50 مىڭ ادام دەمالىسقا كەلدى. ارينە، تابيعات كەشەنىنە دەگەن انتروپوگەندىك قىسىم بار، دەگەنمەن بىزدە جاز مەزگىلى 2-3 اي عانا، قالعان ۋاقىتتا كوكتەم، كۇز، قىستىڭ كۇندەرى تابيعات ءتىرىلىپ، قايتا قالپىنا كەلەدى. ەگەر بىزدە جاز 5-6 ايعا سوزىلسا، وندا قورشاعان ورتانىڭ جاعدايى ءماز بولماس ەدى. ايتار بولساق، كارانتين مەن توتەنشە جاعداي كەزىندە، ياعني ناۋرىز، ءساۋىر، مامىر ايلارىندا بۋرابايدا تيىندەر كوبەيىپ، قۇستار ەركىن ءان سالدى. انتروپوگەندىك قىسىم جان- جانۋارلاردىڭ تىرشىلىگىنە كەرى اسەرىن تيگىزەدى»، - دەيدى ول.

ۇلتتىق پارك باسشىسىنىڭ سوزىنە سەنسەك، وتكەن جىلى پارك اۋماعىنان 2 مىڭ تەكشە مەترگە جۋىق قوقىس شىعارىلسا، ال بيىل مامىر ايىنان بەرى ول كورسەتكىش 700 تەكشە مەترگە جۋىقتاعان.