ءومىرزاق شوكەيەۆ شورناق تۇرعىندارىمەن كەزدەسىپ، ەلدىڭ ۇسىنىس- پىكىرىن تىڭدادى

تۇركىستان. قازاقپارات - تۇركىستان وبلىسىنىڭ اكىمى ءومىرزاق شوكەيەۆ شورناق اۋىلىندا قۇرىلعان جەدەل شتاب وتىرىسىنا قاتىستى.

ءوڭىر باسشىسى وقيعا بولعان ساتتە شۇعىل ارەكەت ەتىپ، ەل تىنىشتىعىن ساقتاۋدا جۇيەلى جۇمىس جاساعان شتاب جۇمىسىنا العىسىن ايتتى، دەپ حابارلايدى قازاقپارات ءتىلشىسى.

جيىننان سوڭ اۋىل تۇرعىندارىمەن كەزدەسكەن وبلىس اكىمى كەلەڭسىز جاعدايعا بايلانىستى پىكىر ءبىلدىردى.

«شورناق - مىڭجىلدىق تاريحى بار مەكەن. كەشە ورىن العان جاعداي بۇكىل ەلگە تاراپ، ىڭعايسىز جاعداي بولدى. ىنتىماعى مەن بىرلىگى جاراسقان اۋىل ءۇشىن بۇل - ۇيات نارسە. ارينە، الەۋمەتتىك جەلىنىڭ دامىعان ۋاقىتىندا بۇل جاعدايدى بۇرمالايتىن ارانداتۋشىلاردىڭ بولارى انىق. تەك سولاردىڭ سوزىنە ەرمەۋ كەرەك. ەل اراسىنا داۋ، ىرتكى سالعان ادامدارعا قاتاڭ جازا قولدانىلادى. ال، سىزدەر جاستار مەن اعا بۋىندى سابىرعا شاقىرىپ، بىرلىكتەرىڭىزدى نىعايتا تۇسىڭىزدەر» دەگەن ءوڭىر باسشىسى مۇنداعى الەۋمەتتىك- ەكونوميكالىق قاجەتتىلىكتەرگە باسا نازار اۋدارىلاتىنىن جەتكىزدى.

وبلىس اكىمىنىڭ ءسوزىن قۇپتاعان اۋىل اقساقالدارى دا ءوز ويلارىن ورتاعا سالىپ، ۇسىنىس- پىكىرلەرىن جەتكىزدى.

«شورناق اۋىلى وسى ۋاقىتقا دەيىن داۋ شىعارعان اۋىل ەمەس ەدى. كەشەگى وقيعا بارلىعىمىزدى ەسەڭگىرەتتى. سەبەبى، الەۋمەتتىك جەلى ارقىلى جالعان اقپارات كوپ تارادى. وسىنداي جاعدايدىڭ ورىن الۋىنا سەبەپ بولعان جاستار ءۇشىن بارلىقتارىڭىزدان كەشىرىم سۇرايمىز. ءبىز، قازاق، وزبەك - اعايىن حالىقپىز. ءتىلىمىز، ءدىنىمىز ءبىر ەلمىز»، - دەدى اۋىل اقساقالدارى.

سونداي- اق، باسقوسۋدا وبلىستىق وزبەك ەتنومادەني بىرلەستىگىنىڭ ءتوراعاسى اۋىل تۇرعىندارىن بىرلىككە، ىنتىماققا شاقىردى. ەسكە سالا كەتەيىك، بۇعان دەيىن الەۋمەتتىك جەلىدە ءبىر توپ ازامات وزدەرىنىڭ نارازىلىعىن بىلدىرگەن بەينەجازبا تاراعان بولاتىن. اتالعان وقيعا كەنتاۋ قالاسىنا قاراستى شورناق اۋىلىندا بولعان. تۇرمىستىق جانجالدى جەرگىلىكتى پوليتسيا قىزمەتكەرلەرى توقتاتقان ەدى.

بۇگىن ق ر ىشكى ىستەر ءمينيسترى ەرلان تۇرعىمبايەۆ شورناقتاعى جاعداي تۇراقتالىپ، 4 ادام قاماۋعا الىنعانىن جاريا ەتتى. كەيىننەن مەملەكەت باسشىسى قاسىم- جومارت توقايەۆ شورناقتاعى جاعداي بويىنشا وبلىس باسشىلىعى جانە قۇقىق قورعاۋ ورگاندارىمەن جيىن وتكىزىپ، ءومىرزاق شوكەيەۆتىڭ بۇزاقىلىقتى دەر كەزىندە تىيعان تىڭعىلىقتى جۇمىسىنا جوعارى باعا بەردى. 20-شىلدە كۇنى ورىن العان وقيعانىڭ جاي- جاپسارى انىقتالىپ، تۇرعىندار قازىرگى تاڭدا ۇيرەنشىكتى ومىرگە قايتىپ ورالعان.