ونلاين قۇربان شالۋ جۇيەسى قالاي جۇمىس ىستەيدى

نۇر-سۇلتان. قازاقپارات - قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى قاشىقتان قۇربان شالۋ جۇيەسىنىڭ جۇمىسىن ءتۇسىندىردى، دەپ حابارلايدى قازاقپارات ءتىلشىسى.

«قۇربان شالۋ - جاعدايى كەلگەن مۇسىلمانعا ءۋاجىپ بولىپ ەسەپتەلەدى. وسىناۋ ۇلتىق عيباداتتى ورىنداۋ ماقساتىندا ءدىني باسقارما ەل مۇسىلماندارىنىڭ ءوتىنىشىن ەسكەرە وتىرىپ، بيىل العاش رەت قۇربان ايت قارساڭىندا حالىقارالىق تاجىريبەلەرگە سۇيەنىپ، قاشىقتان قۇربان شالۋ جوباسىن قولعا الدىق. وسى ماقساتتا https://qurban2020.kz سايتى اشىلىپ، بۇگىننەن باستاپ، 24 ساعات بويى ىسكە قوسىلادى. 30-شىلدەگە دەيىن قۇربان شالۋعا ونلاين تاپسىرىس قابىلدانادى»، - دەدى باس ءمۇفتي ورتالىق كوممۋنيكاتسيالار قىزمەتىندە.

سپيكەردىڭ ايتۋىنشا، ونلاين رەجيمدە تاپسىرىس قابىلداپ، قۇرباندىق ەتىن مۇقتاج جاندارعا تاراتۋ تاجىريبەسى تۇركيا، مالايزيا، يندونەزيا، ءباا سىندى ءبىرقاتار مۇسىلمان مەملەكەتتەردە بۇرىننان قالىپتاسقان جانە داستۇرگە اينالعان.

«بۇل جۇيەنىڭ باستى ەرەكشەلىگى - قۇرباندىق ەتى تۇگەلدەي مۇقتاج جاندارعا تاراتىلادى. العاش رەت ىسكە قوسىلعالى تۇرعان بۇل جۇيەنىڭ كەمشىلىكتەرى بولۋى مۇمكىن. تەحنيكالىق قيىندىقتار تۋىنداسا، تۇسىنىستىكپەن قاراۋدى وتىنەمىز. ونلاين قۇرباندىق جۇيەسىن اشۋداعى ماقسات - سىن- ساعاتتا پايدا تابۋ ەمەس، حالىقتىڭ قۇربان شالۋعا دەگەن قاجەتتىلىگىن جۇزەگە اسىرۋ. ءدىني باسقارمانىڭ ماقساتى - ازاماتتاردىڭ قۇرباندىعىن شالۋدى ۇيىمداستىرۋ. ونلاين تاپسىرىس ارقىلى قۇرباندىق شالۋ كەزىندە داعدىعا اينالعان مالدى تاڭداۋ، قاساپشى جانىنا بارىپ قاتىسۋ مۇمكىندىگى بولمايىن دەپ تۇر. بۇل جوبانى كارانتين كەزىندە قۇربان شالۋعا نيەت ەتكەن ازاماتتاردىڭ نيەتىن جۇزەگە اسىرۋ مۇمكىندىگى رەتىندە ۇسىنىپ وتىرمىز. اللا قالاسا، اتالمىش جوبا كەلەسى جىلى ءوز جالعاسىن تابادى دەپ ۇمىتتەنەمىز. ونلاين قۇرباندىق شالۋدا يمامدارىمىز دەلدالدىق قىزمەت جاسامايدى. ەكى ورتادا ءجۇرىپ پايدا تابۋمەن اينالىسپايدى. ءبىزدىڭ مىندەت - حالىققا قىزمەت، قۇرباندىق شالۋدى ۇيىمداستىرۋ مەن قۇربان ەتتەرىن مۇقتاج جاندارعا ۇلەستىرىپ بەرۋ عانا»، - دەدى ناۋرىزباي قاجى تاعان ۇلى.

وسى كەزگە دەيىن ازاماتتار قۇربان ەتىن ۇشكە ءبولىپ، ءبىر بولىگىنە اعايىن- تۋىس، كورشى- قولاڭعا ايتتىق داستارحان جاياتىن. پاندەميا جاعدايىنا بايلانىستى بيىلعى ونلاين قۇرباندىق شالىنعاندا ەتتىڭ ۇشتەن ءبىرى بەرىلمەي، تۇگەلدەي مۇقتاج جاندارعا ۇلەستىرىلەتىن بولادى.

بۇعان دەيىن ق م د ب ءتوراعاسى قۇربان ايت قارساڭىندا حالىققا ۇندەۋ جاساپ، ساتپايەۆ قالاسىنداعى وقيعاعا قاتىستى پىكىر ءبىلدىردى. 31-شىلدە كۇنى قازاقستان مەشىتتەرىندە قۇربان ايت نامازى وقىلمايدى.