كوروناۆيرۋستىڭ ەكىنشى تولقىنى اۋىر بولا ما؟
ويتكەنى جازدا كۇن ساۋلەسىنەن السىرەگەن كوروناۆيرۋستىڭ كۇشى باستاپقىداي ەمەس. مۇنداي تۇجىرىمعا يتاليا عالىمدارى كەلدى.
يتاليانىڭ ۇلتتىق استروفيزيكا ينستيتۋتى (Inaf) ماماندارى مەن ميلان مەملەكەتتىك ۋنيۆەرسيتەتىنىڭ يممۋنولوگتارى جوتەلگەن، تۇشكىرگەن ادامنىڭ اعزاسىنداعى كوروناۆيرۋس تامشىسىن الىپ كۇننىڭ ۋلتراكۇلگىن ساۋلەسىمەن وندەپ زەرتتەۋ جاساعان. تاجىريبە بارىسىندا كوروناۆيرۋسقا تۇسكەن كۇن ساۋلەسىنىڭ از مولشەرىنىڭ ءوزى ونى السىرەتىپ تاستايتىنى انىقتالدى. سوندىقتان كۇن ىستىق مەملەكەتتەردە ەپيدەميولوگيالىق جاعداي باسقا ەلدەرگە قاراعاندا جاقسى، كوروناۆيرۋسپەن اۋىرعاندار از.
وسىنداي دەرەكتەردى نەگىزگە العان يتاليا عالىمدارى كۇزدە كەلەتىن كوروناۆيرۋس تولقىنى ءالسىز بولادى دەگەندى العا تارتادى.
- جاعداي قالاي بولاتىنىن ەشكىم دە ناقتى ايتا المايدى. ءبىزدىڭ ويىمىزشا، كوروناۆيرۋستىڭ ەكىنشى تولقىنى كەلەدى، ءبىراق كوكتەمدەگىدەي ەمەس، ءبىرشاما جەڭىلدەۋ بولادى، - دەيدى زەرتتەۋ توبىنىڭ مۇشەسى، يممۋنولوگ، پروفەسسور ماريو كلەريچي (Mario Clerici) .
كلەريچيدىڭ ايتۋىنشا، قازىرگى كوروناۆيرۋستىڭ قىستا، اقپاندا تاراعان كوروناۆيرۋستان ايىرماشىلىعى جوق.
- ۆيرۋس ءالى دە قۋاتتى، وزگەرە قويعان جوق. ءبىراق جازداي ىستىق كۇننىڭ اسەرىنەن ءبىرشاما السىرەيتىنى انىق. ماسەلەن، كوكتەمدەگى ۆيرۋستىڭ سىرتقا جايىلعان بولشەكتەرى تۇگەل دەرلىك بەلسەندى، زياندى بولسا، قازىرگىسىنىڭ اۋرۋ شاقىراتىن بولشەكتەرى ازداۋ، - دەيدى پروفەسسور.
دۇنيەجۇزىلىك دەنساۋلىق ساقتاۋ ۇيىمىنىڭ جاڭا دەرەكتەرىنە كوز جۇگىرسەك، الەمدە 14 ميلليون ادام كوروناۆيرۋسقا شالدىعىپ، 600 مىڭعا جۋىعى كوز جۇمعان.
