قازاقستاننىڭ قۇرعاق ساۋمالى مەن شۇباتى ۇلكەن سۇرانىسقا يە - قىتايلىق ب ا ق

نۇر-سۇلتان. قازاقپارات - قىتاي نارىعىندا سوڭعى كەزدەرى قازاقستاننان قۇرعاتىلعان ۇنتاق رەتىندە كەلەتىن بيەنىڭ ساۋمالى مەن تۇيە سۇتىنە قىزىعۋشىلىق ارتا تۇسكەن.

قىتايدىڭ ءبىرقاتار اقپارات قۇرالدارى وسىناۋ ۇلتتىق سۋسىن تۋرالى ارنايى ماقالا جاريالادى.

«قازاقپارات» ح ا ا وسى قىتايلىق ب ا ق- تا جاريالانعان ماقالالاردى وقىرمان نازارىنا ۇسىنادى.

«ماۋسىم ايىندا قازاقستان ساحاراسى گۇلگە ورانادى، الىسقا كوز تاستاساڭىز، ۇشى-قيىرسىز جايىلىمداعى سالقىن سامالمەن تەربەلىپ، قورالى قوي مەن تابىن-تابىن سيىر، ءۇيىر-ءۇيىر جىلقى كوزگە شالىنادى. وسىنداي كورىكتى جەرلەردىڭ ءبىرى قاراعاندى وبىلىسىنداعى ەلدى مەكەندە Saumal جانە Saubota برەندتەرىمەن تانىمال تۇيەنىڭ جانە جىلقىنىڭ قۇرعاق ءسۇت ونىمدەرىن شىعاراتىن «ەۋرازيا ينۆەست لتد» كومپانياسى ورنالاسقان»، دەپ جازعان قىتايدىڭ شينحۋا اقپارات اگەنتتىگى قازاقستاندىق ءونىمنىڭ قىتاي نارىعىنا شىعۋ بارىسىنا توقتالىپتى.

قازاقستان قىتايعا تۇيەنىڭ قۇرعاق ءسۇتىنىڭ ءبىرىنشى پارتياسىن ماۋسىم ايىنىڭ باسىندا جىبەرگەن بولاتىن.

«بۇل جەردەگى 35 مىڭ گەكتار جايىلىمدا 200 دەي تۇيە مەن 2500 دەن استام جىلقى ەمىن-ەركىن جايىلادى. تۇيە ءسۇتى مەن جىلقى ءسۇتىن قازاقستاندىقتار دارۋمەنگە تولى اسىل سۋسىن دەپ باعالايدى. جاقىندا زاۋىتىمىزدان شىققان تۇيە ءسۇتىنىڭ تالقانى قىتاي بازارىنا ءساتتى كىردى. جىلقى ءسۇتىنىڭ ۇنتاعى دا قىتاي نارىعىنا كىرەدى دەگەن ويدامىز. بۇل جاعىنان دا كوپتەگەن جۇمىستار اتقارىلىپ جاتىر»، - دەيدى قىتايلىق باسىلىمعا سۇحبات بەرگەن زاۋىت قىزمەتكەرى بايان ەلشىن ۇلى.

قاراعاندى وبلىسىندا بيە سۇتىنەن ۇنتاق وندىرەتىن زاۋىت 2014-جىلدان بەرى جۇمىس ىستەيدى.

وتكەن جىلى كاسىپورىن تۇيەنىڭ قۇرعاق ءسۇتىن شىعارۋدى يگەردى. جىلىنا 60 توننا تۇيە ءسۇتى تالقانى مەن 60 توننا جىلقى ءسۇتى تالقانىن وندىرە الادى. «وتكەن جىلى ءبىز «قورعاس» شەكارالىق ىنتىماقتاستىق حالىقارالىق ورتالىعىنا 609 ميلليون تەڭگەگە ءونىمىمىزدى ساتتىق. ساتىلىم بيىلعى جىلى دا ارتادى دەپ ۇمىتتەندىك. ءبىراق قاڭتار ايىندا شەكارا جابىلدى، قازىرگى كۇنگە دەيىن قورعاستىڭ ساۋدا الاڭى جابىق بولدى. سوندىقتان، ءوندىرىستى سەرتيفيكاتتاپ، رۇقسات راسىمدەپ، ماۋسىم ايىنىڭ باسىندا 7000 قالبىرداعى كولەمى 3,5 توننادان اساتىن Saubota قۇرعاق تۇيە ءسۇتىنىڭ ءبىرىنشى پارتياسى گانسۋ پروۆينتسياسىنىڭ لانجوۋ قالاسىنا جونەلتىلدى. وسىلايشا، قازاقستاندىق تاۋاردىڭ قىتايعا ەكسپورتتالۋىنىڭ رەسمي باستاماسى جۇزەگە اسىرىلدى. وسى ءساتتى ءبىز 5 جىل كۇتتىك. قىتاي نارىعىنا كىرۋ وتە قيىن بولعاندىقتان، ۇلكەن جۇمىس جۇرگىزىلدى»، - دەيدى «ەۋرازيا ينۆەست ل ت د» ج ش س باس ديرەكتورى قادىربەك مەيرامبەكوۆ.

قىتاي اقپارات قۇرالدارىنىڭ حابارلاۋىنشا، تۇيە ءسۇتىنىڭ ۇنتاعى قاراعاندىدان 2020-جىلدىڭ 5- ماۋسىمىندا جونەلتىلىپ، 6- ماۋسىمدا قورعاس پورتىنا كەلىپ، 8 كۇن وتكەننەن كەيىن لانجوۋ كەشەندى كەدەن ايماعىنا جەتكىزىلگەن.

قىتايلىق ب ا ق تۇيە ءسۇتىن «شولدەگى التىن» جانە «سۇتتەگى قازىنا» دەپ باعالاعان.

«تۇيە ءسۇتى قۇرامىندا اللەرگەندەر جوق، س دارۋمەنى، ۆ دارۋمەنى، ادام اعزاسىنا قاجەت كوپتەگەن قانىقپاعان ماي قىشقىلدارىنا باي. تۇيە ءسۇتى قۇرامىندا جوعارى قورەكتىك مازمۇن مەن جاقسى ءدام بار، ەرەكشە ينگرەديەنتتەر مەن ەففەكتىلەر ونى جاڭا پرەميۋم سۋسىنعا اينالدىرادى»، دەپ جازادى قىتايلىق ب ا ق.

اتالمىش ءونىمدى ق ح ر- عا يمپورتتاۋشى حالىقارالىق ساۋدا شەكتى سەرىكتەستىگىنىڭ جاۋاپتىسى كاڭ كۋەيدىڭ ايتۋىنشا، العاشقى ساۋدا اينالىمى پاندەمياعا جانە قۇجات جۇمىستارىنا بايلانىستى بىرنەشە ايعا سوزىلعان.

الايدا، ەكى تاراپتىڭ جەمىستى جۇمىسىنىڭ ارقاسىندا بارلىق قولايسىزدىقتار ەڭسەرىلىپ، ۇيلەسىمدى اينالىم جوباسى بەكىتىلگەن.

«قازاقستاننان كەلگەن قۇرعاق تۇيە ءسۇتى ءونىمى قىتايدا ۇلكەن سۇرانىسقا يە بولا باستادى. لانجوۋداعى تۇتىنۋشىلار تاپسىرىس بەرگەن سوڭ 24 ساعات ىشىندە قازاقستاننان اكەلگەن تۇيە ءسۇتى تالقانىن تۇتىنا الادى. گانسۋ ولكەسى اۋماعىنداعى باسقا قالالارعا بىرنەشە كۇن ىشىندە جەتكىزىلەدى»، - دەيدى كاڭ كۋەي.

سونىمەن بىرگە باسىلىم، قىتاي كەدەندىك ستاتيستيكا دەرەكتەرىن كەلتىرەدى. 2019-جىلى قىتاي جالپى 1,36 ميلليون ءسۇت تالقانىن يمپورتتاعان. بۇل كولەم 2018-جىلداعىمەن سالىستىرعاندا %20,8 ارتقان. يمپورتتىڭ جالپى سوماسى 8,3 ميلليارد ا ق ش دوللارىن قۇرادى، جىلدىق ءوسىم %15,5. ىندەت ورشىگەن بيىلعى ءتورت اي ىشىندە، قۇرعاق ءسۇت ونىمدەرىنىڭ يمپورتىنىڭ ءوسۋى جالعاسىپ، 3,1 ميلليارد ا ق ش دوللارىنا جەتىپ، سايكەس مەزگىلمەن سالىستىرعاندا %5,5 ارتقان.

«قازاقستاندىق ءسۇت يندۋسترياسىنىڭ قىتاي نارىعىنا شىعۋ - بۇل بيزنەستى دامىتۋ ءۇشىن ۇلكەن مۇمكىندىك. قىتايلىق تۇتىنۋشىلار تۇيە ءسۇتىنىڭ ۇنتاعى تۋرالى ءبىراز بىلەدى جانە نارىق دامىپ كەلەدى. تەكسەرۋ مەن كارانتين ستاندارتتارى بولماعاندىقتان، ءبىز وندىرەتىن جىلقى ءسۇتىنىڭ ۇنتاعى قازىر قىتايعا ەكسپورتتالمايدى، ءبىراق ءبىز جىلقى ءسۇتىنىڭ ۇنتاعى تۋرالى اقپاراتتاردى قىتاي نارىعىنا بەلسەندى تۇردە تاراتىپ جاتىرمىز»، - دەيدى «ەۋرازيا ينۆەست ل ت د» ج ش س باس ديرەكتورى قادىربەك مەيرامبەكوۆ. كاسىپكەر ونىمدەرىنىڭ قىتاي نارىعىنا شىعۋ پەرسپەكتيۆاسىنا تولىق سەنىمدى.