قازاقستاندا بۋبون وباسىنىڭ تارالۋ قاۋپى بار ما

نۇر- سۇلتان. قازاقپارات - قازاقستاندا بۋبون وباسىنىڭ تارالۋ قاۋپى بار ما؟ بۇل سۇراققا وكق- دا وتكەن باسپا ءسوز ءماسليحاتىندا دەنساۋلىق ساقتاۋ ۆيتسە- ءمينيسترى اجار عينيات جاۋاپ بەردى، دەپ حابارلايدى قازاقپارات ءتىلشىسى.

ۆيتسە- ءمينيستردىڭ ايتۋىنشا وبا وكپە فورماسىنا ءوتىپ كەتپەسە بۋبون وباسى ادامنان ادامعا جۇقپايدى. اتالىپ وتكەندەي، قازاقستاندا وبانىڭ تابيعي وشاقتارى بار.

«بۇكىل ەلدەگى وباعا قارسى سانيتارلىق قىزمەتتەر سانيتارلىق الدىن الۋ جۇمىستارىن جۇرگىزىپ، جاعدايدى باقىلاۋىندا ۇستاپ وتىر. ال موڭعوليادان بۋبون وباسىن قازاقستاندىقتاردىڭ جۇقتىرۋ ىقتيمالدىعى تومەن. تەك وبانىڭ وكپە فورماسىن جۇقتىرعان نەمەسە ونىڭ اۋىر فورماسىمەن اۋىرعان ادام ءبىزدىڭ ەلگە كەلمەۋى كەرەك»، - دەدى اجار عينيات.

ايتا كەتەرلىگى موڭعوليادا بۋبون وباسىنىڭ تارالۋىنا بايلانىستى كارانتين ەنگىزىلگەن بولاتىن.