قاراعاندى وبلىسىندا جەدەل جاردەم شاقىرۋ سانى ءۇش ەسەگە ازايدى

قاراعاندى. قازاقپارات - سوڭعى ەكى اپتا ىشىندە قاراعاندى وبلىسىنداعى ەپيدەميولوگيالىق جاعداي تۇراقتاندى.

قازىرگى ۋاقىتتا ءبىر تاۋلىكتە اۋرۋحانادان جازىلىپ شىققان پاتسيەنتتەر سانى ەمدەۋگە جاتقىزىلعاندارعا قاراعاندا كوبىرەك. ستاتسيونارلاردىڭ جۇكتەمەسى تومەندەدى، دەپ حابارلايدى قازاقپارات ءتىلشىسى.

قاراعاندى وبلىسىندا جۇقپالى جانە پۋلموپروۆيزورلىق بەيىندەگى 4486 ورىن بار. جۇقپالى جانە پروۆيزورلىق گوسپيتالدەردەگى ورىندار جۇكتەمەسى %50 عا دەيىن ازايدى. قازىر وبلىس ستاتسيونارلارىندا 2433 ناۋقاس ەمدەلىپ جاتىر. ەپيدەميا باستالعاننان بەرى 4403 ناۋقاس جازىلدى - بۇل ينفەكسيا جۇقتىرعانداردىڭ جالپى سانىنىڭ %62 ى. سونىمەن قاتار جەدەل جاردەمگە جۇگىنۋ سانى دا ازايدى. بۇرىن ديسپەتچەرلەر تاۋلىگىنە 2200 شاقىرىلىم قابىلداسا، قازىر 600 گە دەيىن قوڭىراۋ سوعىلادى.

«جەدەل جاردەم شاقىرۋ ءۇش ەسەگە ازايدى. توسەك-ورىن بار، بۇگىندە ولاردىڭ %50 ى بوس جانە رەزەرۆتە تۇر. ەكى اپتا بۇرىن بۇل كورسەتكىش ايتارلىقتاي جوعارى بولدى جانە %80 دى قۇراعان بولاتىن»، - دەپ اتاپ ءوتتى قاراعاندى وبلىسىنىڭ اكىمى جەڭىس قاسىمبەك ۇكىمەت وتىرىسىندا.

سونداي- اق، وڭىردە اۋرۋحانالاردىڭ جابدىقتالۋىنا ەرەكشە كوڭىل بولىنەدى. ناۋقاستاردى وتتەگىمەن قامتاماسىز ەتۋ ءۇشىن 1500 كونسەنتراتور ساتىپ الىندى، سونداي-اق بەس وبەكتىگە مەديتسينالىق گاز بەرۋدىڭ ورتالىقتاندىرىلعان جۇيەسى ورناتىلدى. قازىر 90 ءو ج ج اپپارات ساتىپ الىنىپ، ولاردىڭ 10 ى وسى اپتادا جەتكىزىلەدى. جاقىندا دەمەۋشىلەر قاراعاندىعا ءوز قارجىسىنا تۇركيادان ساتىپ الىنعان 100 وتتەگى كونسەنتراتىن جانە قاجەتتى ءدارى- دارمەكتى، سونىڭ ىشىندە انتيكواگۋليانتتاردى جەتكىزدى.

«بۇگىندە 17 كومپيۋتەر توموگرافياسى كابينەتى جۇمىس ىستەيدى. قازان ايىندا تاعى بەسەۋى - شاحتينسك، قاراعاندى، بالقاش، جەزقازعان، ساتبايەۆ قالالارىندا ورناتىلادى. سونىمەن قاتار، ءبىز 25 زاماناۋي ساندىق رەنتگەن اپپاراتىن ساتىپ الامىز»، - دەدى ايماق باسشىسى.

سونداي-اق، وڭىردە دارىلىك زاتتاردىڭ ستراتەگيالىق قورىن قالىپتاستىرۋ بويىنشا جۇمىس جۇرگىزىلۋدە. رەسەيدەن 17 توننا ءدارى كەلىپ ءتۇستى. ءدارى-دارمەكتەردى جەتكىزۋدى ءۇش ەسە ۇلعايتۋ جوسپارلانىپ وتىر.