پانفيلوۆشىلار ساياباعىنداعى ۇلكەن شۇڭقىر كوپشىلىكتىڭ نارازىلىعىن تۋعىزدى
جوندەۋ جۇمىسىنا كوڭىلى تولماعان تۇرعىندار الەۋمەتتىك جەلىدە ءوز ويىن جەتكىزىپ جاتىر.
اتاپ ايتقاندا، پارك اۋماعىندا قازىلعان شۇڭقىر ەلدىڭ نارازىلىعىن تۋعىزدى . اكىمدىكتىڭ جايلى قالالىق ورتا باسقارماسى بۇعان قاتىستى تۇسىنىك بەردى. ولاردىڭ ايتۋىنشا، بۇل شۇڭقىر قوسىمشا رەزەرۆۋار ۇستاۋ ءۇشىن قازىلعان.
«پاركتىڭ سۋعارۋ جۇيەسىن ۇزدىكسىز سۋمەن قامتاماسىز ەتۋ ءۇشىن اباتتاندىرۋ جوباسىندا قوسىمشا رەزەرۆۋار ورناتۋ قاراستىرىلعان. قازىرگى تاڭدا اۋدانى - 12/9/4,85 مەتر، كولەمى - 300 تەكشە مەتر بولاتىن رەزەرۆۋار ورناتۋ باستالدى» دەدى باسقارمادان.
بۇل جوبا «جۇمىسپەن قامتۋ» باعدارلاماسى اياسىندا جۇزەگە اسىرىلىپ جاتىر. «جوبا 2018 -جىلى جاسالدى. «گ س گ ۆىسوتنيك» ج ش س- مەن كەلىسىمشارت جاسالدى. بيىل 28 پانفيلوۆشى ساياباعىن قايتا جاڭعىرتۋ جوباسى قايتا قارالدى. جوبالىق- سمەتالىق قۇجاتتاما وزگەرتىلىپ، قاراجات قايتا ەسەپتەلدى. كەيبىر اسا قاجەتى جوق شىعىندار قىسقارتىلدى. اتاپ ايتقاندا، سۋبۇرقاق قۇرىلىسى، بالالار مەن سپورت الاڭدارى سالىنبايتىن بولدى. تروتۋار تاستارى 60 پايىزعا عانا توسەلەدى. قازىر پارك مۇلكىنىڭ اقاۋ اكتىسى بار. سوعان سايكەس ابدەن توزىعى جەتكەن دۇنيەلەر عانا اۋىستىرىلادى. ينسپەكتسيا جۇمىستارى بارلىق مۇلىكتىڭ جارتىسىنان كوبى اۋىستىرۋدى تالاپ ەتەتىنىن كورسەتتى»، - دەدى باسقارمادان.
اتاپ ايتقاندا، ارىق جۇيەسى 1980 -جىلداردان بەرى اۋىستىرىلماعان. ال ارىق ناۋالارى اسا قاتتى توزباعاندىقتان، ولاردى اۋىستىرۋ كەيىنگە قالدى. بۇل قاراجاتتى ۇنەمدەۋگە مۇمكىندىك بەردى. جوبا بويىنشا 111 جارىقتاندىرۋ تۇعىرىن اۋىستىرۋ كوزدەلگەن.
«وڭتايلاندىرۋ ناتيجەسىندە تەك قاتتى شىرىگەن 21 تۇعىر اۋىستىرىلاتىن بولدى. بۇل مۇنارالار 2020 -جىلدىڭ ماۋسىمىندا «الماتى قالا جارىق» كومپانياسى وكىلدەرىنىڭ قاتىسۋىمەن الىنىپ تاستالدى. قالعانىندا تەك شامدارى اۋىسادى» دەدى باسقارمادان.
