جەڭىس قاسىمبەك وتاندىق تاۋارلاردى كوبىرەك پايدالانۋدى تالاپ ەتتى

قاراعاندى. قازاقپارات - كارانتين كەزىندە باسىمدىقتاردىڭ ءبىرى - وتاندىق ءوندىرىستى قولداۋ بولۋى ءتيىس، دەپ حابارلايدى قازاقپارات وبلىس اكىمدىگىنىڭ رەسمي سايتىنا سىلتەمە جاساپ.

قاراعاندى وبلىسىنىڭ اكىمى جەڭىس قاسىمبەك مەملەكەتتىك باعدارلامالار بويىنشا جۇزەگە اسىرىلاتىن جوبالاردا قازاقستاندىق جانە جەرگىلىكتى تاۋارلاردى پايدالانۋدى جەكە باقىلاۋعا الادى. جەرگىلىكتى قامتۋدى دامىتۋ ماسەلەلەرى ونلاين رەجيمىندە وتكەن اپپاراتتىق كەڭەستە تالقىلاندى.

وڭدەۋشى ونەركاسىپ كاسىپورىندارى جاڭا ءونىم شىعارۋدى يگەرگەنى اتاپ ءوتىلدى. مىسالى، قۇرىلىس يندۋسترياسى سالاسىندا وبلىستا 150 ءوندىرۋشى جۇمىس ىستەيدى. جەرگىلىكتى تاۋارلاردىڭ اسسورتيمەنتى ۇلكەن: سەمەنت، تەمىر بەتوندى بۇيىمدار، مەتاللوپلاستيك، رادياتورلار، ارماتۋرا، قۇرعاق قۇرىلىس قوسپالارى جانە ت. ب.

بۇل سالادا يندۋستريالاندىرۋ كارتاسى بويىنشا جالپى سوماسى 25 ميلليارد تەڭگەگە 13 جوبا ىسكە قوسىلدى. «قاراپايىم زاتتار ەكونوميكاسى» باعدارلاماسى بويىنشا قۇرىلىس يندۋسترياسىنىڭ 7 جوباسى ماقۇلداندى.

ماشينا جاساۋ، حيميا ونەركاسىبى، جەڭىل ونەركاسىپ سياقتى سالالاردا دا دامۋ ءجۇرىپ جاتىر. وبلىستا 215 تاماق ونەركاسىبىنىڭ قايتا وڭدەۋ كاسىپورىندارى تىركەلگەن. ا و ك سالاسىندا 31 ينۆەستيتسيالىق جوبا ىسكە اسىرىلۋدا، ونىڭ 12 ءى اۋىل شارۋاشىلىعى ونىمدەرىن قايتا وڭدەۋ بويىنشا.

2020-جىلى قايتا وڭدەۋ بويىنشا 8 جوبانى ەنگىزۋ جوسپارلانعان. مەملەكەتتىك ساتىپ الۋ باسقارماسى التى سالا بويىنشا «قاراپايىم زاتتار ەكونوميكاسى» جوباسىنداعى جەرگىلىكتى قامتۋ ۇلەسىن تالداۋدى ۇسىندى. ەڭ جوعارى كورسەتكىش - %87,2 - قۇرىلىس ماتەريالدارى بويىنشا بايقالادى. تاماق ونەركاسىبىندە ول %67,2، جەڭىل ونەركاسىپتە - %46,4 قۇرايدى.

جەڭىس قاسىمبەك جۇمىسپەن قامتۋ جول كارتاسى نىساندارىندا وتاندىق تاۋارلاردى پايدالانۋدى ەرەكشە باقىلاۋعا الۋدى تاپسىردى.

- مەردىگەرلەردىڭ قازاقستاندا جانە ءبىزدىڭ وبلىستا وندىرىلەتىن ءونىمدى بارىنشا ساتىپ الۋىن جەكە باقىلايمىن. قالالار مەن اۋدانداردىڭ اكىمدەرى جەرگىلىكتى قامتۋدى باقىلاۋدى كۇشەيتۋى ءتيىس. بۇل جۇمىس ورىندارى مەن سالىقتار! ءوز تۇرعىندارىمىزدى جۇمىسپەن قامتۋ كەرەك، - دەپ اتاپ ءوتتى وبلىس اكىمى.