يلون ماسك ميللياردەردىڭ العاشقى وندىعىنا ەندى
قازىرگى ۋاقىتتا يلون ماسكتىڭ مەنشىگىندە 70,8 ميلليارد دوللار بار. توپ-10 قاتارىنا ەنۋگە وعان Tesla اكتسيالارىنىڭ باعاسى ءوسۋى سەبەپ بولعان.
اتالعان رەيتينگتە ماسك سەگىزىنشى ورىنعا ىلىكتى. ناۋرىز ايىنىڭ ورتاسىندا Tesla جانە SpaceX باسشىسى تىزىمدە 31-ورىندا تۇرعان بولاتىن. الايدا 14-شىلدەدە ونىڭ تابىسى ءۇش ەسەگە ارتقانى بەلگىلى بولدى. سوڭعى ءتورت ايدا Tesla اكتسيالارى %320 عا وسكەن.
ەڭ باي ادامدار رەيتينگىندەگى العاشقى ۇشتىكتى Amazon كورپوراتسياسىنىڭ يەسى دجەفف بەزوس (178,6 ميلليارد دوللار) باستاسا، بىلتىر ءتورتىنشى ورىنعا تۇراقتاعان Louis Vuitton Moet Hennessy كومپانياسىنىڭ باس ديرەكتورى بەرنار ارنو (113,4 ميلليارد) ەكى ساتى العا جىلجىدى. Microsoft كومپانياسىنىڭ نەگىزىن قالاعان بيلل گەيتس (112,4 ميلليارد) ءۇشىنشى ورىنعا ءتۇستى.
رەيتينگتەگى وزگەرىستەرگە پاندەميا ايتارلىقتاي اسەر ەتكەن. اتالعان تىزىمگە ىلىككەن جاڭا ەسىم تەك يلون ماسك قانا ەمەس، Microsoft كومپانياسىنىڭ بۇرىنعى باس ديرەكتورى ستيۆ بالمەر دە العاش رەت وندىق قاتارىنان كورىنگەن. ناۋرىز ايىنىڭ ورتاسىنان باستاپ Microsoft اكسيالارى %47 عا قىمباتتادى. ناتيجەسىندە بالمەر الەمنىڭ ەڭ باي ادامدارى تىزىمىندە التىنشى ورىندى يەمدەندى. ونىڭ جاعدايى $72,1 ميللياردقا باعالاندى.
