ميلليوننان استام قازاقستاندىق ازىق-تۇلىك جانە تۇرمىستىق جيىنتىق ءۇشىن تولەم الادى
«ق ر ەڭبەك جانە حالىقتى الەۋمەتتىك قورعاۋ مينيسترلىگى شىلدە ايىندا ازىق-تۇلىك جانە تۇرمىستىق جيىنتىقتار ءۇشىن قاراجات تولەۋدى كوزدەيتىن بۇيرىقتى ازىرلەپ، قابىلدادى. قازاقستاندىقتار 20- شىلدەدەن باستاپ ايدىڭ سوڭىنا دەيىن بانك كارتاسىنا تولەم الا باستايدى»، دەلىنگەن حابارلامادا.
بۇيرىق كۇشىنە ەنگەن كەزدە تولەم 5 الەۋمەتتىك توپقا جاتاتىن ازاماتتارعا بەرىلەدى. جەرگىلىكتى اتقارۋشى ورگاندار قولدا بار دەرەكتەر نەگىزىندە ازىق-تۇلىك جانە تۇرمىستىق جيىنتىق الۋعا ءتيىستى ادامداردىڭ ءتىزىمىن جاسايدى. سودان كەيىن شىلدە ايىنا، ياعني شەكتەۋ شارالارىنىڭ قولدانىلۋ كەزەڭىندە الۋشىلارعا سوماسى 2 ا ە ك مولشەرىندە تولەم جىبەرىلەدى.
5 الەۋمەتتىك توپ:
- اتاۋلى الەۋمەتتىك كومەك الۋشىلار قاتارىنان 6 جاستان 18 جاسقا دەيىنگى بالالار؛
- مەديتسينالىق-الەۋمەتتىك مەكەمەلەردە تۇراقتى تۇراتىن مۇگەدەكتەردى قوسپاعاندا، 16 جاسقا دەيىنگى مۇگەدەك بالالار؛
- مەديتسينالىق-الەۋمەتتىك مەكەمەلەردە تۇراقتى تۇراتىن مۇگەدەكتەردى قوسپاعاندا، بارلىق جاستاعى I ، II ، III توپتاعى مۇگەدەكتەر؛
- مۇگەدەك بالا تاربيەلەپ وتىرعان ادامدار؛
- جۇمىسپەن قامتۋ ماسەلەلەرى جونىندەگى جەرگىلىكتى ورگاندا تىركەلگەن جۇمىسسىز ازاماتتار جاتادى.
بۇعان دەيىن حابارلانعانداي، كوروناۆيرۋس ينفەكتسياسىن جۇقتىرۋ قاۋپىن ازايتۋ ماقساتىندا ادامداردىڭ تىكەلەي بايلانىسىن بولدىرماۋ ءۇشىن ازىق-تۇلىك جانە تۇرمىستىق جيىنتىقتى 2 ا ە ك- تەن كەم بولمايتىن مولشەردە الۋشىلاردىڭ بانك كارتاسىنا اۋدارىلعان تولەمگە اۋىستىرىلدى.
ناۋرىز ايىنان مامىر ايىنا دەيىن بۇل تولەمدەر جالپى سوماسى 13,5 ميلليارد تەڭگەگە 1 ميلليون ادامعا ەسەپتەلگەن.
ەستەرىڭىزگە سالا كەتەيىك، 14- شىلدەدە ق ر پرەمەر-ءمينيسترى اسقار مامين ۇكىمەت وتىرىسىندا ق ر ەڭبەك جانە حالىقتى الەۋمەتتىك قورعاۋ مينيسترلىگىنە قازاقستاندىقتارعا ازىق-تۇلىك جانە تۇرمىستىق جيىنتىقتار ءۇشىن اقشالاي قاراجات تولەۋدى باستاۋدى تاپسىرعان بولاتىن.
بۇعان دەيىن ق ر پرەزيدەنتى قاسىم-جومارت توقايەۆ كورونوۆيرۋس ينفەكتسياسىنىڭ تارالۋىنا جول بەرمەۋ شارالارىن كۇشەيتۋدى تاپسىردى. تابىسسىز قالعان قازاقستاندىقتاردى قولداۋ ءۇشىن جاردەماقىلار، ءبىرجولعى تولەمدەر تولەندى، ونىڭ ىشىندە ازىق-تۇلىك جانە تۇرمىستىق جيىنتىقتار بەرىلدى.
