ەلورداداعى بوتانيكالىق باقتا دەمالۋشىلارعا كارانتين ەرەجەلەرى ءتۇسىندىرىلدى - فوتو
رەيد بارىسىندا ءتارتىپ ساقشىلارى تۇرعىنداردى ماسكا تاعۋ رەجيمى مەن باسقا دا قاۋىپسىزدىك شارالارىن ساقتاۋعا شاقىردى، دەپ حابارلايدى قازاقپارات ءتىلشىسى.
«كوروناۆيرۋس ينفەكسياسىن جۇقتىرۋشىلاردىڭ كوبەيۋىنە بايلانىستى نۇر-سۇلتان قالاسىنىڭ باس سانيتارلىق دارىگەرى شەكتەۋ شارالارىن ۇستىمىزدەگى جىلدىڭ 2-تامىزىنا دەيىن ۇزارتۋ تۋرالى شەشىم قابىلدادى. وسىعان بايلانىستى، ەلوردانىڭ پوليتسيا دەپارتامەنتىنىڭ قىزمەتكەرلەرى الدىن الۋ جانە ءتۇسىندىرۋ شارالارىن جالعاستىرۋدا. اتاپ ايتقاندا، پاندەميا كەزىندە ماسكالاردى مىندەتتى تۇردە كيۋ جانە جەكە قاۋىپسىزدىك ەرەجەلەرىن ساقتاۋ تۋرالى ازاماتتارمەن ءتۇسىندىرۋ جۇمىستارىن جۇرگىزەمىز. پروكۋراتۋرا، سانيتارلىق- ەپيدەميولوگيالىق قاداعالاۋ جانە پوليتسيا قىزمەتكەرلەرىنەن تۇراتىن باقىلاۋ توپتارى قۇرىلدى. ولار تاماقتانۋ، ويىن- ساۋىق، سپورت نىساندارىنا رەيدتەر جۇرگىزەدى. سونداي-اق، ازاماتتارعا كارانتيندىك شارالاردى ساقتاماعانى ءۇشىن قولدانىستاعى زاڭناماعا سايكەس جاۋاپكەرشىلىك قاراستىرىلعانىن ەسكە سالعىم كەلەدى»، - دەپ ءتۇسىندىردى نۇر-سۇلتان قالالىق پوليتسيا دەپارتامەنتىنىڭ ەسىل اۋداندىق پوليتسيا باسقارماسىنىڭ باستىعى ماديار ايتۋعانوۆ.
بۇگىن مونيتورينگ توبى بوتانيكالىق باققا بارىپ، وندا دەمالىپ جۇرگەن ازاماتتارعا ءتۇسىندىرۋ جۇمىستارىن جۇرگىزىپ، حالىقتى نۇر-سۇلتان قالاسىنىڭ باس مەملەكەتتىك سانيتارلىق دارىگەرى بەلگىلەگەن سانيتارلىق نورمالار مەن تالاپتارعا ساي ەرەجەلەردى ساقتاۋعا شاقىردى.
«ءبىرىنشى كەزەكتە ەگەر ءبىز ازاماتتاردىڭ تارتىپكە ادەيى مويىنسۇنبايتىنىن كورسەك نەمەسە سول زاڭبۇزۋشىلىقتار بويىنشا ازاماتتار قايتادان ۇستالسا، ءتيىستى حاتتاما تولتىرىلادى. ازاماتتاردىڭ نەگىزگى بولىگى ءتۇسىندىرۋ جۇمىستارىنا تۇسىنىستىكپەن قارايدى. ءبىراق بۇل شارالار حالىقتىڭ ءوز قاۋىپسىزدىگى ءۇشىن جاسالاتىنىن تۇسىنبەيتىندەر دە بار»، - دەدى ماديار ايتۋعانوۆ.
كارانتين رەجيمىن ساقتاماعانى ءۇشىن جەكە تۇلعالارعا 30 ا ە ك (83,340 تەڭگە)، زاڭدى تۇلعالارعا 230 ا ە ك (638940 تەڭگە) ايىپپۇل سالىناتىنىن ايتا كەتۋ كەرەك.
«ءبىز قوعامدىق ورىنداردا، اتاپ ايتقاندا ساياباقتار مەن الاڭداردا ازاماتتار اراسىندا ءتۇسىندىرۋ جۇمىستارىن جۇرگىزەمىز. بوتانيكالىق باقتا تۇرعىندار دەمالىسىن نەگىزىنەن وتباسىلارىمەن بىرگە وتكىزەدى. ايتا كەتۋ كەرەك، ءسىز جالعىز نەمەسە ءۇش ادامنان اسپايتىن جاعدايدا جۇرە الاسىز. ەگەر بۇل تالاپتار ورىندالماسا، تۇرعىنداردى جاۋاپقا تارتۋعا بولادى. ياعني ولارعا 30 ا ە ك ايىپپۇل سالىنادى. ءبىز ەلوردا تۇرعىندارى مەن قوناقتارىن قوعامدىق ورىنداردا بەتپەردە كيۋگە، الەۋمەتتىك قاشىقتىقتى ساقتاۋعا، ءوز دەنساۋلىعىنا جانە باسقالاردىڭ دەنساۋلىعىنا قاۋىپ توندىرمەۋ ءۇشىن ماسكا تاعۋ رەجيمىن ساقتاۋعا شاقىرامىز»، - دەپ قورىتىندىلادى نۇر-سۇلتان قالاسى ەسىل اۋداندىق تاۋارلار مەن قىزمەتتەردىڭ ساپاسىن باقىلاۋ جانە سانيتارلىق-گيگيەنالىق باقىلاۋ ءبولىمىنىڭ باسشىسى ايمان جاناتايەۆا.
