پرەزيدەنت اۋرۋحانالاردى وتتەگىمەن قامتاماسىز ەتۋ ماسەلەسىن شەشۋ ءۇشىن ۇكىمەتكە بەس كۇن بەردى

نۇر-سۇلتان. قازاقپارات - پرەزيدەنت قاسىم-جومارت توقايەۆ اۋىر جاعدايدا جاتقان ناۋقاستاردىڭ كوبەيۋىنە بايلانىستى اۋرۋحانالاردى وتتەگىمەن قامتاماسىز ەتۋ ماسەلەسى العا شىققانىن ءمالىم ەتتى، دەپ حابارلايدى قازاقپارات ءتىلشىسى اقورداعا سىلتەمە جاساپ.

«مەملەكەتتىك ورگانداردىڭ تاراپىنان ۇيلەستىرۋ جۇمىستارى دۇرىس جۇرگىزىلمەگەندىكتەن، حالىق بۇل ماسەلەنى ءوز بەتىمەن شەشۋگە تالپىنۋدا. بۇل ەشقانداي قيسىنعا ساي كەلمەيدى! ازاماتتار وندىرىستىك باللوندارعا قۇيىلعان وتتەگى ساتىپ الىپ جاتىر. بۇل - اۋرۋحانالاردىڭ تىكەلەي مىندەتى. جەكە ۇيلەر مەن پاتەرلەردە وندىرىستىك باللوندارداعى وتتەگىنى پايدالانۋ دەرەكتەرى انىقتالعان. ۇكىمەت پەن اكىمدەر بەس كۇن ىشىندە اۋرۋحانالاردى وتتەگىمەن قامتاماسىز ەتۋ جانە ءۇي جاعدايىندا وتتەگى باللوندارىن پايدالانۋ پروبلەمالارىن شەشۋى كەرەك»، - دەدى مەملەكەت باسشىسى كوروناۆيرۋس ينفەكتسياسىنىڭ تارالۋىنا قارسى كۇرەس ماسەلەلەرى بويىنشا سەلەكتورلىق وتىرىسىندا.