ابايدىڭ قارا سوزدەرى ۋكراين تىلىنە اۋدارىلدى

كيەۆ. قازاقپارات - ۋكرايناداعى قازاقستاننىڭ ەلشىلىگى ابايدىڭ قارا سوزدەرىنىڭ ۋكراين تىلىندەگى اۋدارماسىن جارىققا شىعاردى، دەپ حابارلايدى قازاقپارات.

كىتاپتىڭ تانىستىرىلىمى 2020 -جىلدىڭ 15 - شىلدەسىندە كانيەۆ قالاسىنداعى ۋكرايننىڭ ۇلى اقىنى ءارى سۋرەتشىسى تاراس شيەۆچەنكو اتىنداعى مۋزەيدە ءوتتى.

«ۋكرايناداعى قازاقستاننىڭ ەلشىسى دارحان كالەتايەۆ شاراعا قاتىسۋشىلارعا ابايدىڭ ولمەس مۇراسى مەن شىعارماشىلىعى تۋرالى ايتىپ بەردى. اۋدارما اۆتورى - فيلولوگيا عىلىمدارىنىڭ دوكتورى، پروفەسسور نيكولاي ۆاسكوۆ اباي شىعارماسى تۋراسىندا ءوز اسەرىمەن ءبولىستى. ول ابايدىڭ ۇلىلىعى شىعارماسىندا عانا ەمەس، ءومىر ءسۇرۋ سالتىندا، پاتريوتيزمىندە، ۇلت الدىنداعى جاۋاپكەرشىلىگىندە ەكەنىن اتاپ ءوتتى»، - دەپ حابارلايدى ۋكرايناداعى قازاقستاننىڭ ەلشىلىگىنەن.

ت. شيەۆچەنكو اتىنداعى مۋزەي ديرەكتورى يگور ليحوۆوي اباي مەن كوبزاردىڭ ۇقساستىعى تۋرالى وي ءوربىتتى. ەكى ەلدىڭ ۇلى ويشىلدارى ونىڭ ويىنشا، ادامداردى ءوزىن- ءوزى دامىتۋعا، ادىلەتتىك پەن مەيىرىمدىلىككە شاقىرا وتىرىپ، ۇلتتىق سانادا توڭكەرىس جاساعان. ۋكرايناداعى قازاق دياسپوراسىنىڭ وكىلدەرى اباي تۋرالى بىلىمدەرىمەن ءبولىسىپ قانا قويماي، ويشىلدىڭ سوزدەرى مەن ولەڭدەرىن قازاقشا وقىپ بەردى. شاراعا سونىمەن بىرگە ۋكراينانىڭ جەرگىلىكتى ينتەلەگەنتسياسىنىڭ، اكادەميالىق ورتاسىنىڭ، ساراپشىلار بىرلەستىگىنىڭ، سونداي- اق مەملەكەتتىك باسقارۋ ورگانىنىڭ وكىلدەرى قاتىستى. ەلشىلىك مۋزەي مەن وبلىستىق مەملەكەتتىك اكىمشىلىككە كىتاپتىڭ بىرنەشە داناسىن تاپسىردى.