شەتەلدەگى قانداستار جىبەرگەن گۋمانيتارلىق كومەك اۋرۋحانالارعا تاراتىلۋدا

نۇر- سۇلتان. قازاقپارات - تۇركيا مەن ەۋروپاداعى قانداستاردان كەلگەن گۋمانيتارلىق كومەك اۋرۋحانالارعا تاراتىلىپ جاتىر، دەپ حابارلايدى قازاقپارات «وتانداستار» قورىنا سىلتەمە جاساپ.

ايتا كەتەيىك، 14- شىلدە كۇنى نۇر-سۇلتان ۋاقىتىمەن ساعات 02:30 دا تۇركيا مەن ەۋروپاداعى قانداستار بىرىگىپ ۇيىمداستىرعان گۋمانيتارلىق كومەك قازاقستانعا كەلىپ جەتكەن بولاتىن.

كومەكتىڭ جالپى سالماعى - 900 كيللوگرامعا جۋىق. ونىڭ ىشىندە مەديتسينالىق زاتتار (بەتپەردە، تەرمومەتر، قورعانىش كوستيۋمدەرى جانە باسقالار) جانە وكپەنى جاساندى جەلدەتۋ قۇرىلعىلارى بار.

بۇل مەديتسينالىق جابدىقتار ەلىمىزدەگى مەديتسينا ورتالىقتارىنا ۇلەستىرىلەدى. جۇكتىڭ ءبىر بولىگىن بۇگىن «دۇنيەجۇزى قازاقتارىنىڭ قاۋىمداستىعى»، «وتانداستار قورى» جانە ەلىمىزگە تۇركيادان ارنايى كەلگەن قازاق دياسپوراسىنىڭ وكىلدەرى نۇر-سۇلتان قالاسىنداعى جۇقپالى اۋرۋلار ورتالىعىنا تاپسىردى.

گۋمانيتارلىق كومەكتىڭ قالعان بولىگى الماتى، شىمكەنت جانە ش ق و ەمحانالارىنا جەتكىزىلەدى.

«الەمنىڭ قاي تۇسىندا جۇرسە دە، اتاجۇرت وتانىن ۇمىتپاي، قيىن-قىستاۋ ۋاقىتتا ەلىمىزگە قول ۇشىن سوزىپ، بىردەن كومەك كورسەتكەن تۇركياداعى، ەۋروپاداعى قانداستارىمىزعا، اعايىن-باۋىرلارىمىزعا جانە وسى جۇكتى جەتكىزۋگە اتسالىسقان بارلىق مەملەكەتتىك مەكەمەلەرگە العىس ايتامىز.

«دۇنيەجۇزى قازاقتارىنىڭ قاۋىمداستىعى» مەن «وتانداستار كورى» اتىنان ريزاشىلىعىمىزدى جەتكىزەمىز»، - دەدى جۋرناليستەرگە سۇحبات بەرگەن «وتانداستار قورى» ك ە ا ق ۆيتسە-پرەزيدەنتى ماعاۋيا سارباسوۆ.