رۋمىنيا استاناسىندا «نۇر-سۇلتان» ساياباعى اشىلدى

بۋحارەست. قازاقپارت - بۇگىن رۋمىنيا استاناسىنىڭ ەڭ كورىكتى جەرلەرىنىڭ بىرىندە «نۇر-سۇلتان» ساياباعى سالتاناتتى تۇردە اشىلدى، دەپ حابارلايدى قازاقپارات.

ق ر سىرتقى ىستەر مينيسترلىگىنەن ءمالىم ەتكەندەي، ءىس-شارانى قازاقستاننىڭ رۋمىنياداعى ەلشىلىگى قازاقستان- رۋمىن ىسكەرلىك كەڭەسىنىڭ جانە بۋحارەست قالاسى 1-سەكتور مەرياسىنىڭ قولداۋىمەن وتكىزدى.

ساياباقتىڭ اشىلۋى ەلوردا كۇنىنە جانە ق ر تۇڭعىش پرەزيدەنتى - ەلباسى نۇرسۇلتان نازاربايەۆتىڭ مەرەيتويىنا ورايلاستىرىلعان. وعان مەملەكەتتىك ورگانداردىڭ وكىلدەرى، رۋمىنيانىڭ قوعامدىق جانە ىسكەرلىك توپتارى، ديپلوماتيالىق كورپۋس پەن ب ا ق وكىلدەرى قاتىستى.

«ايتۋلى ءىس-شاراعا نۇر-سۇلتان قالاسى ەسىل اۋدانىنىڭ اكىمدىگى مەن بۋحارەست قالاسى 1-سەكتورىنىڭ مەرياسى اراسىنداعى ءوزارا تۇسىنىستىك تۋرالى مەموراندۋم سەبەپكەر بولدى»، - دەلىنگەن اقپاراتتا.

ەلشى نۇرباح رۇستەموۆ ءوزىنىڭ العى سوزىندە ەلباسىنىڭ قازاق ەلىنە سىڭىرگەن ەڭبەگى مەن ايرىقشا جەكە قاسيەتتەرىنە ەرەكشە نازار اۋدارىپ، ق ر تۇڭعىش پرەزيدەنتىنىڭ ارقاسىندا ەلىمىز حالىقارالىق ساحنادا جوعارى دەڭگەيگە قول جەتكىزگەنىن جانە قازىرگى زامانعى الەم تاريحىندا لايىقتى ورىنعا يە بولعانىن اتاپ ءوتتى.

«بايانداماشىلار ەكىجاقتى قاتىناستاردىڭ دامۋىنداعى وڭ ديناميكانى، سونداي-اق «نۇر-سۇلتان» ساياباعىنىڭ اشىلۋى دوستاس ەكى حالىق اراسىنداعى مادەني-گۋمانيتارلىق ىنتىماقتاستىقتى دامىتۋداعى ماڭىزدى قادام رەتىندە قاراستىرىلاتىنىن، قازاقستان-رۋمىنيا بايلانىستارىن تەرەڭدەتۋدەگى وسىنداي مادەني وزەكتى وقيعالاردىڭ تاريحي ماڭىزدىلىعىنا نازار اۋداردى. ق ر تۇڭعىش پرەزيدەنتى - ەلباسى ن. نازاربايەۆتىڭ 1998 جانە 2007 -جىلدارى رۋمىنياعا جاساعان ساپارلارى قازاقستان- رۋمىنيا قاتىناستارىنا العاش سەرپىن بەرگەن بولاتىن. سول ۋاقىتتان بەرى رۋمىنيا قازاقستانعا 1,7 ميلليارد ا ق ش دوللار ينۆەستيتسيالادى. ەكى ەل اراسىنداعى جىلدىق تاۋار اينالىمى بۇگىندە 1,8 ميلليارد ا ق ش دوللارىنا جەتتى»، - دەلىنگەن س ءى م مالىمەتىندە.