قاۋىپسىزدىگىمىز ءۇشىن تاڭداۋ جاسايتىن ءسات كەلدى - التاي كولگىنوۆ
«قادىرمەندى قالا تۇرعىندارى! قاۋىپسىزدىگىمىز ءۇشىن تاڭداۋ جاسايتىن ءسات كەلدى. مەديتسينا قىزمەتكەرلەرى سوڭعى ءتورت اي بويى كوروناۆيرۋس ينفەكسياسىمەن كۇرەستە الدىڭعى شەپتە كەلەدى. بارلىق مۇمكىندىكتەرىن پايدالانىپ قىزمەت ەتىپ جاتقان دارىگەرلەرىمىزدىڭ ءتىپتى وتباسىمەن قاۋىشۋ مۇمكىندىگى بولماي ءجۇر. كۇن- ءتۇن دەمەي ەڭبەك ەتىپ جاتقان ولار - ءسوزسىز باتىر، ءبىراق تۇسىنەيىك، ولار دا ادام. جانى دا، ءتانى دە شارشايدى. باستاپقىدا دارىگەرلەردىڭ وسى كۇرەستە قالۋىنا دا، كەتۋىنە دە مۇمكىندىك بولدى. ءبىراق ولار قالۋدى ۇيعاردى. سوندىقتان، ءبىزدىڭ ولارعا وسىنداي قيىن ساتتە كومەگىمىز بەن قۇرمەتىمىز - ۇيدەن شىقپاي، تارتىپكە باعىنۋىمىز بولۋى كەرەك. دارىگەرلەرگە كومەكتەسۋ ءۇشىن بارشاڭىزدى ءبىر عانا دۇرىس تاڭداۋ جاساۋعا شاقىرامىز. سەبەبى مەديتسينا قىزمەتكەرلەرىنە ءدال قازىر ءبىزدىڭ كومەگىمىز اۋاداي قاجەت. تۇسىنىڭىزدەر، ءدال قازىرگى ساتتە ولاردىڭ ارقاسىنا ارتىلعان اۋىر جۇكتى ەشتەڭەمەن سالىستىرۋعا كەلمەيدى»، - دەپ جازدى قالا اكىمى.
ونىڭ دەرەگىنشە، بۇگىندە بىرنەشە باس دارىگەر، جانساقتاۋ ءبولىمىنىڭ مەڭگەرۋشىسى جانە العاشقى كۇننەن بەرى كۇرەستە جۇرگەن تاعى باسقا مەديتسينا قىزمەتكەرلەرىنىڭ وزدەرى اۋىرىپ قالدى. ولار وسى وسى ۋاقىت ارالىعىندا ءبىر عانا ادامنىڭ ءومىرىن ساقتاپ قالعان جوق، جازىلىپ شىققان مىڭداعان ادامنىڭ وتباسىلارىنا دا شاتتىق سىيلادى.
«پاندەميا باستالعان تۇستا بىزدە 1 عانا ستاتسيونار بولسا، قازىر ولاردىڭ سانى 12-گە جەتتى. زەرتحانا دا بىرەۋ عانا ەدى، قازىر 8- ءى جۇمىس ىستەپ تۇر. باس كەزىندە 300 ادامعا دەيىن سىناما تاپسىرا السا، قازىر كۇنىنە 5,5 مىڭ ادامعا پ ت ر- تەست جاسالادى. قازىرگى جاعدايعا قاراساق، بۇنىڭ ءوزى جەتكىلىكسىز. ينفەكسيا جۇقتىرعانداردىڭ سانى كوبەيە بەرەتىن بولسا، ءبىز امالسىزدان ءىرى سپورت نىساندارىن ستاتسيونار ەتىپ ازىرلەيمىز. ناۋقاستارعا ورىن تابىلار، ءبىراق، ولاردى كىم ەمدەيدى؟ مەملەكەت جۇزدەگەن، مىڭداعان توسەك ورىنمەن دە، مەديتسينا قۇرىلعىلارىمەن دە قامتاماسىز ەتە الادى. ءبىراق ونىڭ بارىنە وقىعان مامان، دارىگەرلەردى قايدان تابامىز؟
ءيا، ءبىز قالاعا دەزينفەكسيا جاساۋعا، باقىلاۋ بەكەتتەرىنە جۇمىس ىستەۋگە ەرىكتىلەر مەن اسكەريلەردى تارتتىق. ءبىراق ادام جانىن ساقتاپ قالۋ ءۇشىن ەرىكتىلەردىڭ ەرىك- جىگەرى جەتكىلىكسىز. وعان ارنايى مەديتسينا ءبىلىمىن العان مامان قاجەت. اياق استى نەمەسە اسىعىپ دارىگەر دايىنداپ شىعۋ تاعى مۇمكىن ەمەس. دارىگەرلەرگە قولعابىس، وزدەرىنە تاجىريبە بولسىن دەپ مەديتسينالىق ۋنيۆەرسيتەتتەر مەن كوللەدجدەردەن ستۋدەنتتەردى تارتىپ جاتىرمىز. ءبىراق، ادام ومىرىنە اراشا تۇسە الاتىنداي تولىققاندى مامان بولۋ ءۇشىن جىلدار بويعى وقۋ مەن تاجىريبەلى ەڭبەك قاجەت ەكەنىن ءسىز دە، ءبىز دە جاقسى ءتۇسىنىپ وتىرمىز»، - دەدى التاي كولگىنوۆ.
ەلوردا اكىمىنىڭ دەرەگىنشە، قالادا 3,5 مىڭ دارىگەر مەن 8 مىڭ مەديتسينا قىزمەتكەرى بار. ال حالىق سانى - 1 ميلليون 200 مىڭ.
«جەدەل جاردەم ستانساسىنىڭ جۇمىسىنان مىسال رەتىندە ايتار بولساق، شاقىرتۋلار 1 مىڭنان 4 مىڭعا دەيىن كوبەيگەن. وسى اپتادا تاۋلىگىنە 4300 قوڭىراۋ ءتۇستى. جەدەل جاردەم ستانسياسىنىڭ بازاسىندا قۇرىلعان كولل- ورتالىق سول اۋىرتپالىقتىڭ ءبىر بولىگىن كوتەرىپ كەلەدى. سونىمەن قاتار تەلەگرام- بوت اشىپ، تۇرعىنداردىڭ جەدەل كومەك شاقىرۋىنا جاعداي جاسالدى. جەدەل جاردەم بريگادالارىنىڭ سانىن 150-گە دەيىن كوبەيتتىك»، - دەدى ول.
ونىڭ اتاپ وتۋىنشە، قازىر قالاداعى بارلىق اۋرۋحانا مەن ەمحانا كوروناۆيرۋسپەن كۇرەسكە جۇمىلدىرىلعان. ءبىرىنشى قالالىق اۋرۋحانانى تولىقتاي ستاتسيونارعا اينالدىرىلعان. ناتيجەسىندە قوسىمشا 600 ورىن اشىلدى. سوڭعى 10 كۇننىڭ ىشىندە عانا ناۋقاستارعا ارنالعان ورىن 1300-دەن 3100-گە- گە، ياعني ءۇش ەسەگە كوبەيدى.
«ءاربىر بەكىتىلگەن ەمحانا بويىنشا كومپيۋتەر توموگرافياسىن ءتۇسىرۋ جونىندە بىرنەشە رەسپۋبليكالىق كلينيكامەن كەلىسىم جاسادىق. كومپيۋتەر توموگرافياسىن جاساۋ پنيەۆمونيانى باستاپقى كەزەڭىندە انىقتاۋعا مۇمكىندىك بەرەدى. سونىمەن قاتار قوسىمشا كت جانە يۆل اپپاراتتارىن ساتىپ الىپ جاتىرمىز. تەلەمەديتسينا تاجىريبەسىن پايدالانۋدامىز. سيمپتومسىز تاسىمالداۋشىلاردى ەمدەۋ ءۇشىن مەديتسينا قىزمەتكەرلەرى وسى ارقىلى ناۋقاستىڭ جاعدايىن باقىلاۋدا ۇستاپ وتىر. سيمپتوم بولعان جاعدايدا اۋرۋحاناعا جاتقىزىلادى. ارنايى وقىتىلعان قىزمەتكەرلەردەن تۇراتىن سيتۋاتسيالىق ورتالىق جۇمىسىن باستادى. ولار بەلگىلى ءبىر مەكەمەدە ناۋقاستاردىڭ توپتالۋىنا جول بەرمەي، كوروناۆيرۋس ينفەكتسياسىن جۇقتىرعان ناۋقاستاردى ءبولىپ وتىرادى. بۇل بارلىق ستاتسيوناردىڭ جۇمىسىن ۇيلەستىرۋگە سەپتىگىن تيگىزىپ جاتىر. ءتيىستى اقپاراتتار مەن كونسۋلتاتسيالار الۋعا قولايلى COVID-19 سايتى جاسالدى. دۇيسەنبى كۇنى ىسكە قوسىلادى»، - دەدى قالا باسشىسى.
التاي كولگىنوۆ ەندى بەكىتىلگەن ەرەجەلەرگە جاۋاپسىزدىقپەن قاراپ، وسى ۇيلەسىمدى جۇمىستىڭ ءبارىن جوققا شىعارۋعا بولمايتىندىعىن باسا ايتادى.
«قاۋىپسىزدىك شارالارىن ساقتاماعاندىقتان مەديتسينا قىزمەتكەرلەرىنە وتە اۋىر سالماق ءتۇسىرىپ جاتىرمىز. «قاۋىپ قايدان بولسا قاتەر سودان» دەيدى. قازىرگى ۋاقىتتا قاۋىپتىڭ دە، قاتەردىڭ دە قايدان ەكەنىن جاقسى بىلەسىزدەر. ساقتىقتا قورلىق جوق. ءوزىمىز بەن جاقىندارىمىزدىڭ ومىرىنە جانە وزگەلەردىڭ ادال ەڭبەگىنە قۇرمەت تانىتىپ، قاۋىپسىزدىك شارالارىن قاتاڭ ساقتايىق»، - دەدى نۇر- سۇلتان اكىمى.
اۆتور: مارلان جيەمباي
