ەلجان ءبىرتانوۆ ءوزىنىڭ مينيستر لاۋازىمىنان بوساتىلۋ سەبەبىن ءتۇسىندىردى

نۇر-سۇلتان. قازاقپارات - ەلجان ءبىرتانوۆ مەملەكەت باسشىسىنان دەنساۋلىق ساقتاۋ ءمينيسترى لاۋازىمىنان بوساتۋدى وتىنگەنىن ءمالىم ەتتى، دەپ حابارلايدى قازاقپارات ءتىلشىسى.

«قۇرمەتتى ارىپتەستەر مەن دوستار! بۇگىن مەن مەملەكەت باسشىسىنان دەنساۋلىق ساقتاۋ ءمينيسترى لاۋازىمىنان بوساتۋدى سۇرادىم. وكىنىشكە قاراي، كوروناۆيرۋس ينفەكسياسىن جۇقتىرىپ العاننان كەيىن اۋرۋ كۇردەلى پنيەۆمونياعا ۇلاسىپ، قوسىمشا ەم-دوم قابىلداۋ قاجەتتىگى تۋدى»، - دەپ جازدى ەكس-مينيستر Facebook پاراقشاسىندا.

ونىڭ جازۋىنشا، قازىرگى تاڭدا ەلدەگى ەپيدەميولوگيالىق احۋالدىڭ كۇردەلەنۋىنە بايلانىستى سالانى تولىققاندى باسشى باسقارۋى كەرەك.

«مينيسترلىك دەڭگەيىندە دە، ايماقتار دەڭگەيىندە دە سولاي ەسەپتەيمىن. ءبىزدىڭ دەنساۋلىق ساقتاۋ جۇيەسى تۇسكەن جۇكتەمەنى ەڭسەرەتىنىنە سەنىمدىمىن. وعان ۋاقىت جانە ءاربىرىمىزدىڭ كۇش-جىگەرىمىز كەرەك. ءوز ارىپتەستەرىمنىڭ بارىنە دەنساۋلىق پەن تاباندىلىق تىلەيمىن»، - دەيدى ەلجان ءبىرتانوۆ.

جازبا سوڭىندا ەلجان ءبىرتانوۆ قازاقستاننىڭ دەنساۋلىق ساقتاۋ سالاسىن دامىتۋعا ۇلەس قوسۋعا مۇمكىندىك بەرىپ، سەنىم بىلدىرگەن مەملەكەت باسشىسىنا العىسىن ايتتى.

ەسكە سالا كەتسەك، بۇگىن مەملەكەت باسشىسىنىڭ جارلىعىمەن ەلجان ءبىرتانوۆ قازاقستان رەسپۋبليكاسىنىڭ دەنساۋلىق ساقتاۋ ءمينيسترى قىزمەتىنەن بوساتىلىپ، ونىڭ ورنىنا بۇگىن الەكسەي سوي تاعايىندالدى. ق ر پرەمەر-ءمينيسترى اسقار مامين مەملەكەت باسشىسىنىڭ جارلىعىمەن تاعايىندالعان مينيستر الەكسەي سويدى دەنساۋلىق ساقتاۋ مينيسترلىگىنىڭ ۇجىمىنا تانىستىردى.

ال ەلجان ءبىرتانوۆتىڭ كوروناۆيرۋس جۇقتىرىپ، اۋرۋحاناعا تۇسكەنى تۋرالى اقپارات 14-ماۋسىمدا تاراعان بولاتىن.