قازاق ءتىلىن بىلمەيتىن مەملەكەتتىك قىزمەتكەر ۇعىمى اناحرونيزمگە اينالۋعا ءتيىس – ق ر پرەزيدەنتى
بۇل تۋرالى مەملەكەت باسشىسى قاسىم-جومارت توقايەۆ رەسپۋبليكالىق «انا ءتىلى» باسىلىمىنا بەرگەن سۇحباتىندا ايتتى، دەپ حابارلايدى قازاقپارات ءتىلشىسى.
«ءبىزدىڭ مەملەكەتتىك ءتىلدىڭ جاعدايىن قايتا-قايتا كوتەرىپ، ونىڭ مۇشكىل ءحالى تۋرالى ايتا بەرگەنىمىزگە وزگە ەلدەر، اسىرەسە ورتالىق ازياداعى مەملەكەتتەر تۇسىنبەي، تاڭدانىسپەن قارايدى. قازىر - ناعىز از سويلەپ، كوپ ءىس تىندىراتىن شاق. ولاي بولماعان جاعدايدا ءبىز ءوزىمىزدى حالىقارالىق قوعامداستىقتىڭ الدىندا كەمشىن ۇلت رەتىندە كورسەتەمىز. ال ەندى نە ىستەۋ كەرەك؟ بىرىنشىدەن، قازاق تىلىندە سويلەۋ ماقتانىش بولۋى ءۇشىن قوعامدا وعان دەگەن قاجەتتىلىكتى ارتتىرعان ءجون. مەملەكەتتىك قىزمەتكە، ونىڭ ىشىندە، حالىقپەن تىعىز جۇمىس ىستەيتىن لاۋازىمعا تاعايىنداۋ كەزىندە كاسىبي بىلىكتىلىگىنە قوسا، قازاق ءتىلىن جاقسى بىلەتىن ازاماتتارعا باسىمدىق بەرۋ كەرەك. پارلامەنتتە نەمەسە باسپا ءسوز ءماسليحاتتارىندا مەملەكەتتىك تىلدە سويلەپ، پىكىر الماسا المايتىن مەملەكەتتىك قىزمەتكەر ۇعىمى، ەڭ الدىمەن، قازاق ازاماتتارىنىڭ اراسىندا - اناحرونيزمگە اينالۋعا ءتيىس»، - دەدى مەملەكەت باسشىسى.
ق ر پرەزيدەنتى ەكىنشىدەن، ءبىز قازاق ءتىلىن جاقسى بىلەتىن وزگە ۇلت وكىلدەرىن قولداۋىمىز كەرەكتىگىن باسا ايتتى.
«ولاردى پارلامەنتكە، وكىلەتتى ورگاندارعا سايلاپ، مەملەكەتتىك قىزمەت جۇيەسىندەگى جوعارى لاۋازىمدارعا تاعايىنداپ، مەملەكەتتىك ناگرادالارمەن ماراپاتتاپ وتىرعانىمىز دۇرىس. مۇنداي ازاماتتار قازاق ءتىلىنىڭ دەڭگەيىن ۇلتارالىق قولدانىس دارەجەسىنە كوتەرۋگە كومەكتەسەدى. ۇشىنشىدەن، قازاق ءتىلىن قولدانۋ بارىسىندا فونەتيكالىق جانە ورفوگرافيالىق قاتەلەر جىبەرىپ الاتىن وتانداستارىمىزعا تۇسىنىستىكپەن قاراپ، تولەرانتتىلىق تانىتۋىمىز كەرەك. مۇنداي ازاماتتار جاستارىمىزدىڭ اراسىندا دا از ەمەس. ولاردىڭ تالپىنىسىن مازاق ەتپەي، قايتا قولداي تۇسكەنىمىز ءجون»، - دەدى قاسىم-جومارت توقايەۆ.
مەملەكەت باسشىسى تورتىنشىدەن، تەلەۆيزيالىق جانە راديو حابارلارىنىڭ ساپاسىن ارتتىرۋ قاجەتتىگىنە نازار اۋدارتادى.
«بۇل اقپارات ونىمدەرى رەسەي باعدارلامالارىنىڭ كوشىرمەسىنە ەمەس، قايتا قوعامدىق ويدىڭ قاينار كوزىنە اينالۋعا ءتيىس. ارزان ويىن-كۇلكىدەن گورى، ۇلتتىق يدەياعا قىزمەت ەتەتىن توپىراعىمىزدان تامىر العان ءتول باعدارلامالاردى مولايتۋ قاجەت. مەنىڭشە، ورتالىق ازياداعى كورشىلەرىمىزدىڭ تاجىريبەسى بىزگە پايدالى ءارى ۇلگى بولارلىقتاي»، - دەدى ق ر پرەزيدەنتى.
