08:24, 24 - ماۋسىم 2020 | GMT +5
تەننيس: الەمنىڭ ءبىرىنشى راكەتكاسى كوروناۆيرۋس جۇقتىردى
نۇر- سۇلتان. قازاقپارات - سەرب تەننيسشىسى، الەمنىڭ ءبىرىنشى راكەتكاسى نوۆاك دجوكوۆيچ حورۆاتياداعى تۋرنير كەزىندە كوروناۆيرۋس جۇقتىردى، دەپ حابارلايدى قازاقپارات euronews.com اگەنتتىگىنە سىلتەمە جاساپ.
ونىڭ ايەلىنەن دە كوروناۆيرۋس ينفەكتسياسى تابىلعان.
«ءبىز ءتۋرنيردى ىندەت تولقىنى باسىلعاندا ۇيىمداستىرعان ەدىك. وسىنداي جاعدايدا جارىس وتكىزۋگە بولادى دەپ سەندىك. وكىنىشكە قاراي، ۆيرۋس ەشقايدا كەتكەن جوق، ءبىز وسى شىندىققا كوندىگۋگە ءتيىسپىز. مەن وسى تۋرنيردە كوروناۆيرۋس جۇقتىرعان ءار ادامنان كەشىرىم سۇرايمىن. ولاردىڭ دەنساۋلىعىنا زيان كەلە قويمايدى، ءبارى امان-ەسەن جازىلىپ كەتەدى دەپ ۇمىتتەنەم. ال ءوزىم 14 كۇنگە وقشاۋلانامىن. بەس كۇننەن كەيىن قايتادان تەست تاپسىرامىن»، - دەيدى تەننيسشى نوۆاك دجوكوۆيچ.
وسىدان ءبىر كۇن بۇرىن سول تۋرنيردە بولگاريالىق تەننيسشى گريگور ديميتروۆ پەن حورۆات سپورتشىسى بورنا چوريچتىڭ اۋرۋ جۇقتىرعانى بەلگىلى بولعان ەدى.
