كوكشەتاۋ مەن ستەپنوگور قالالارى كارانتينگە جابىلادى

كوكشەتاۋ. قازاقپارات - اقمولا وبلىسىنىڭ باس سانيتارلىق دارىگەرىنىڭ جاڭا قاۋلىسى شىقتى. وسى قۇجاتقا ساي كوكشەتاۋ مەن ستەپنوگور قالالارىندا كارانتيندىك شەكتەۋلەر كۇشەيتىلەدى، دەپ حابارلايدى قازاقپارات ءتىلشىسى.

اقمولا وبلىستىق تاۋارلار جانە كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايناگۇل مۋسينانىڭ قاۋلىسىندا سايكەس، 2020 -جىلعى ماۋسىمنىڭ 24- ءى ساعات 00:00 باستاپ كوكشەتاۋ قالاسى كارانتينگە جابىلسا، 26- ماۋسىم ساعات 00:00 باستاپ وسىنداي شارالار ستەپنوگور قالاسىندا قولعا الىنادى.

بارلىق اۆتوكولىكتەر مەن ازاماتتارعا بۇل قالالاردىڭ اۋماعىنا كىرۋگە جانە شىعۋىنا تيىم سالىنادى، ترانزيتتىك جۇك اۆتوكولىكتەرى جانە ازىق- تۇلىك تاۋارلارىن تاسىمالدايتىن اۆتوكولىكتەردى ەسەپكە الماعاندا.

سونىمەن بىرگە، كوكشەتاۋ مەن ستەپنوگور قالالارىندا كەشكى ساعات 22:00-دەن تاڭعى 06:00-عا دەيىن اۆتوكولىكتەر مەن تۇرعىنداردىڭ قوزعالىسىنا تيىم سالىنادى. بۇدان بولەك، اتالمىش قالا تۇرعىندارىنا ماسكا تاعۋ جانە ءبىر رەتتىك پەرچاتكا قولدانىپ، قولدى انتيسەپتيكپەن جۋۋعا كەڭەس بەرىلەدى. جاسى 65-تەن اسقاندارعا ءوزىن ءوزى وقشاۋلاۋ رەجيمىن ساقتاۋ ۇسىنىلادى.

اۆتور: اسلان وسپانوۆ