تۇركىستان وبلىسىندا ەرلىكپەن قازا تاپقان پوليتسەيدىڭ قىزى اكە جولىن جالعاستىرىپ كەلەدى

تۇركىستان. قازاقپارات - تۇركىستان وبلىسىندا قىلمىسكەردى قۇرىقتاۋ جولىندا ەرلىكپەن قازا تاپقان پوليتسەيدىڭ قىزى اكە جولىن جالعاستىرىپ كەلەدى.

وبلىستىق پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ جەدەل ۋاكىلى ايگۇل رىسباي قىزى ەر ازاماتتارمەن بىرگە يىق تىرەسە جۇمىس اتقارۋدا، دەپ حابارلايدى قازاقپارات ءتىلشىسى.

پوليتسيا كاپيتانى رىسباي قۇدايبەرگەنوۆ 1984 -جىلدىڭ 9-شىلدەسىندە اسا قاۋىپتى قىلمىسكەردى ۇستاۋ كەزىندە قازا تاپقان. ارتىندا جارى داريعا مەن ءتورت قىزى قالدى. ءۇش ايدان سوڭ دۇنيەگە ارمان اتتى ۇلى كەلدى. ال، قىزدارىنىڭ ءبىرى ايگۇل اكە جولىن جالعاستىرۋدى بالا كۇنىنەن ماقسات ەتكەن.

ول قازاق - رەسەي ۋنيۆەرستەتىنىڭ زاڭ فاكۋلتەتىن ءبىتىرىپ، ىشكى ىستەر ورگاندارىندا 2005 -جىلدان بەرى قىزمەت اتقارىپ كەلەدى. كەنتاۋ قالاسىندا كامەلەتكە تولماعاندار ءىسى جونىندەگى ءبولىمنىڭ، ايەلدەردى زورلىق- زومبىلىقتان قورعاۋ توبىنىڭ، شتاب توبىنىڭ، شىمكەنت قالاسى ءال-فارابي اۋداندىق پوليتسيا باسقارماسىندا اعا ينسپەكتورى قىزمەتتەرىن ابىرويمەن اتقاردى. ول بۇگىنگى كۇنى تۇركىستان وبلىستىق پوليتسيا دەپارتامەنتىندە قىزمەت ەتىپ، كوپتەگەن قىلمىستىڭ اشىلۋىنا جانە قۇقىقبۇزۋشىلىقتىڭ الدىن الۋعا ءوز ۇلەسىن قوسىپ كەلەدى.

«پوليتسيا قىزمەتكەرىنىڭ قوعام الدىنداعى جاۋاپكەرشىلىگى جوعارى. مەنىڭ اكەم رىسباي قۇدايبەرگەنوۆ «سوۆەت ميليتسياسىنىڭ ۇزدىگى»، «قىلمىستى ىزدەستىرۋ قىزمەتىنىڭ تاڭداۋلى ينسپەكتورى» بەلگىلەرىن كەۋدەسىنە تاققان ءتارتىپ ساقشىسى بولعان. ول كەنتاۋ قالالىق ىشكى ىستەر بولىمىندە ۋچاسكەلىك ينسپەكتور، كەيىننەن قىلمىستى ىزدەستىرۋ ءبولىمى باستىعىنىڭ ورىنباسارى قىزمەتتەرىن ابىرويمەن اتقارعان. قازىرگى تاڭدا كەنتاۋ قالاسىندا ول كىسىنىڭ اتىنا ءبىر كوشە بەرىلىپ، ەسكەرتكىش تاقتا ورناتىلعان. ەل تىنىشتىعى ءۇشىن ءومىرىن قيعان اكەمنىڭ وسيەتتەرى ماعان قاشاندا قىمبات. مەن اكەمدى ماقتان تۇتىپ، ونىڭ اتىنا كىر كەلتىرمەۋگە تىرىسامىن»، - دەيدى ايگۇل رىسباي قىزى.

اۆتور: اينۇر اقبايەۆا