تۇركىستان وبلىسىندا ەرلى-زايىپتى ازاماتتار بلوكپوستاردا ءۇش اي قىزمەت ەتكەن
سايرام اۋدانىندا ۋچاسكەلىك پوليتسيا ينسپەكتورى بولىپ قىزمەت اتقاراتىن رىسداۋلەت سۇيەۋبەكوۆ جارى جانسايا ەرالحان ەكەۋى پاندەمياعا قارسى ءىس-شارالارعا بەلسەندى اتسالىستى، دەپ حابارلايدى قازاقپارات ءتىلشىسى.
كارانتين ەنگىزىلگەننەن باستاپ پوليتسيا قىزمەتكەرلەرى مەن مەديتسينا ماماندارى بىرلەسىپ، ساقتىق شارالارىن قولعا العاندا ءاربىر اۋىلعا، ەلدىمەكەنگە بلوكپوستار قويىلعانى بەلگىلى. وندا پوليتسيا مەن مەديتسينا قىزمەتكەرلەرى كۇشەيتىلگەن رەجيمدە جۇمىس ىستەدى.
وسىنداي ازاماتتاردىڭ قاتارىندا سايرام ا پ ب قىزمەتكەرى رىسداۋلەت سۇيەۋبەكوۆ پەن ەمحانادا مەدبيكە بولىپ ەڭبەك ەتەتىن جانسايا ەرالحان دا ءبىر كىسىدەي كەزەكشىلىكتە بولدى.
ۋچاسكەلىك ينسپەكتور سايرام اۋدانىنا كىرەبەرىستەگى جاعدايدى قاداعالاسا، جانسايا شىمكەنتتەگى بەكەتتە تۇرعىنداردى تەكسەرىپ تۇرعان. ال، ۇيدەگى بالا-شاعاسىن اجەلەرىنە اماناتتاپتى. جاس وتباسى وسىلايشا ءۇش اي بويى وتباسىنان جىراقتا ءجۇرىپ، وزدەرىنە جۇكتەلگەن جۇمىستى ابىرويمەن اتقارىپ شىقتى.
«قاۋىپ قاتەرمەن بەتپە-بەت كەلىپ، پاندەمياعا قارسى ءىس-شارالارعا اتسالىستىق. جالپى قاۋىپتى اۋرۋمەن كۇرەستە بارلىعىمىز انتقا ادالدىق تانىتتىق. «ءبىز بىرگەمىز» ۇرانى ءبارىمىزدى جىگەرلەندىرە ءتۇستى. قانداي جاعداي بولماسىن، ءارقاشان ەلىمىزدىڭ تۇراقتىلىعى مەن ازاماتتارىمىزدىڭ بەيبىت ءومىرى ءۇشىن جۇكتەلگەن مىندەتتەردى ورىنداۋعا ءازىرمىز. قاۋىپسىزدىك شارالارىن ءوزىمىز دە قاتاڭ ۇستاندىق. قولعاپتار مەن بەتپەردەنى، كيىمدەرىمىزدى ۋاقتىلى اۋىستىرىپ، زالالسىزداندىرۋ جۇمىستارىن ۋاقىتىلى اتقاردىق. كوزگە كورىنبەيتىن ۆيرۋسپەن كۇرەس، ارينە وڭاي بولعان جوق»، - دەيدى پوليتسيا اعا لەيتەنانتى.
بۇگىندە ۋچاسكەلىك پوليتسيا ينسپەكتورى وزىنە بەكىتىلگەن ايماقتا قالىپتى جۇمىسقا كىرىسكەن. ال، جارى جانسايا بولسا شىمكەنتتەگى جۇمىسىنا بارىپ كەلىپ ءجۇر.
اۆتور: اينۇر اقبايەۆا
