قازاقستان پرەزيدەنتى كوروناۆيرۋستان قايتىس بولعانداردىڭ تۋىستارى مەن جاقىندارىنا كوڭىل ايتتى
«بۇگىندە الەمدەگى بارلىق ەلدەر، سونىڭ ىشىندە قازاقستاندا كوروناۆيرۋس ىندەتىنە قارسى كۇرەس جۇرگىزىلۋدە. بۇل، ارينە، وتە اۋقىمدى ءارى كۇردەلى جۇمىس. وسىعان وراي مەملەكەت تاراپىنان تەڭدەسسىز شارالار قابىلداندى. كوروناۆيرۋسپەن كۇرەسۋ ءۇشىن بيۋجەتتەن قوماقتى قاراجات ءبولىندى. تۇرمىسى تومەن وتباسىلارعا ازىق-تۇلىك تاراتىلدى. شاعىن جانە ورتا بيزنەس وكىلدەرىنە ءبىرقاتار جەڭىلدىك جاسالدى. ەلباسىنىڭ باستاماسىمەن قۇرىلعان «بىرگەمىز» قورىنان دا كولەمدى قارجى ءبولىنىپ، مۇقتاج جاندارعا ناقتى كومەك بەرىلىپ جاتىر»، - دەدى مەملەكەت باسشىسى.
ق ر پرەزيدەنتى بۇل جۇمىستى Nur Otan پارتياسى بەلسەندى تۇردە جۇزەگە اسىرىپ جاتقانىن باسا ايتتى.
«وسىنىڭ ءبارى بىرلىگىمىزدىڭ بەكەمدىگىن كورسەتەدى. دەگەنمەن، بۇل اسا جۇقپالى دەرت ازاماتتارىمىزدىڭ دەنساۋلىعى مەن ومىرىنە قاۋىپ ءتوندىرىپ، حالىقتىڭ ءال-اقۋاتىنا نۇقسان كەلتىرۋدە. ەڭ الدىمەن وسى كەسەلدەن قايتىس بولعان ادامداردىڭ تۋىستارى مەن جاقىندارىنا كوڭىل ايتامىن. سونداي-اق ۆيرۋس جۇقتىرعانداردىڭ تەزىرەك ساۋىعىپ كەتۋىنە تىلەكتەستىك بىلدىرەمىن»، - دەدى قاسىم-جومارت توقايەۆ.
