11:57, 23 - ماۋسىم 2020 | GMT +5
قازاقستاندا بيزنەس سۋبەكتىلەرىنە جوسپارلى سالىققا تەكسەرۋلەر جۇرگىزىلمەيتىن بولدى
نۇر-سۇلتان. قازاقپارات - قازاقستاندا جىل سوڭىنا دەيىن بيزنەس سۋبەكتىلەرىنە جوسپارلى سالىققا تەكسەرۋلەر جۇرگىزىلمەيدى.
بۇل تۋرالى بيزنەستى قولداۋ ماسەلەلەرى بويىنشا ءوتىپ جاتقان ۇكىمەت وتىرىسىندا ۇلتتىق ەكونوميكا ءمينيسترى رۋسلان دالەنوۆ ءمالىم ەتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ تاپسىرماسى بويىنشا وسى جىلدىڭ 1-قاڭتارىنان باستاپ ءۇش جىلعا شاعىن جانە ميكروكاسىپكەرلىككە تەكسەرۋ جانە پروفيلاكتيكالىق باقىلاۋ جۇرگىزۋگە موراتوريي ەنگىزىلگەنىن بىلەسىزدەر. سونىمەن قاتار جىلدىڭ سوڭىنا دەيىن بيزنەستىڭ بارلىق ساناتتاعى سۋبەكتىلەرى ءۇشىن جاڭا جوسپارلى سالىقتىق تەكسەرۋلەر جۇرگىزىلمەيدى»، - دەدى رۋسلان دالەنوۆ.
ونىڭ ايتۋىنشا، كاسىپكەرلەردىڭ قۇقىقتارىن قورعاۋ ءۇشىن كاسىپكەرلەردىڭ «ادالدىق» پرەزۋمپتسياسى قولدانىستا. بۇل زاڭناماداعى ءارتۇرلى تۇسىنىكتەردى ادال كاسىپكەرلەردىڭ پايداسىنا قولدانۋعا مۇمكىندىك بەرەدى.
