استانالىق دارىگەر كوزىنە جاس الىپ، اۋرۋحاناداعى اۋىر جاعدايدى ايتىپ بەردى

نۇر-سۇلتان. قازاقپارات - نۇر-سۇلتاننىڭ دەنساۋلىق ساقتاۋ باسقارماسىنىڭ باس ينفەكسيونيسى ساۋلە اتىعايەۆا «حابار» تەلەارناسىنا قالالىق جۇقپالى اۋرۋلار ورتالىعىنىڭ جانساقتاۋ بولىمىندەگى جاعداي تۋرالى ايتىپ بەردى.

«ەگەر 28-قاڭتاردان باستاپ ساناساق، جۇمىستا جۇرگەنىمىزگە بەس اي بولدى. ۇيگە مۇلدە بارمايمىز. العاشقى كۇننەن باستاپ اۋرۋحانا جارتىلاي بوس قالعان كۇن جوق. ءبىراق سوڭعى اپتادا ادامداردىڭ دا، جاعدايى اۋىر ناۋقاستاردىڭ دا سانى ءوستى.

قازىر ستاتسيونارد جاتقان 95 پايىز ناۋقاس - پنيەۆمونيا، تىنىس الۋ جەتىسپەۋشىلىگى بارلار - وتتەگىن قاجەت ەتەتىندەر. ءبىزدىڭ جانساقتاۋ ءبولىمى تولى»، - دەيدى دارىگەر.

مامان قازاقستاندىقتاردى جاعدايعا سانالى تۇردە قاراپ، ءوزىن جانە جاقىندارىن ساقتاۋعا شاقىردى.

«مەن دەمىگىپ قالاتىن، جاعدايى ناشار، وتتەگى جەتىسپەيتىن ناۋقاستاردى ءجيى كورەمىن. 28 جىل جۇمىس ىستەپ، مۇنداي سۇمدىقتى ءبىرىنشى رەت كورۋىم. كوپتەگەن ادام قايتىس بولادى. ەشتەڭەنى ەسكەرمەيتىندىكتەن. سىرتقا شىعادى، قوناققا بارىپ، ادامدارعا جۇقتىرادى. «يتاليالىق سەناري» دەپ جاتامىز. ءبىراق ول شىن مانىندە دە سولاي»، - دەيدى كوزىنە جاس العان دارىگەر.

«سەنىڭىزدەر، بۇل وتە قيىن. ءبارىمىزدىڭ قولىمىزدان انتيدەپريسانت تۇسپەيدى. باسقاشا بولمايدى. وسىلاي جۇرگەنىمىزگە ءتورت اي بولدى، بۇل - ناعىز توزاق. شىن مانىندە وتە قيىن»، - دەيدى ساۋلە اعىتايەۆا.

ەسكە سالايىق، 22-ماۋسىمداعى مالىمەت بويىنشا، نۇر-سۇلتاندا كوروناۆيرۋس جۇقتىرعان 3451 ادام بار. ونىڭ 2291 ى اۋرۋدان ايىعىپ شىققان.