ۇ ب ت-نىڭ ناقتى ناتيجەسى قاشان شىعاتىنى ءمالىم بولدى

نۇر-سۇلتان. قازاقپارات - ۇلتتىق ءبىرىڭعاي تەستىلەۋدىڭ ناقتى ناتيجەسى تامىز ايىنىڭ سوڭىندا بەلگىلى بولادى.

بۇل تۋرالى ق ر ب ع م ۇلتتىق تەستىلەۋ ورتالىعى ديرەكتورىنىڭ ورىنباسارى ناۋجان ديداربەكوۆا ايتتى، دەپ حابارلايدى قازاقپارات ءتىلشىسى.

«ۇ ب ت- نىڭ ءبىرىنشى كۇنگى قورىتىندىسىنا كەلەر بولساق، شەكتى بالدى جيناعانداردىڭ سانى 4 222 ادامدى قۇرايدى. بۇل تەست تاپسىرۋشىلاردىڭ بارلىعىنىڭ 68,3 پايىزىنا تەڭ. ال شەكتى باللدى جيناي الماعاندار - 1964 تەست تاپسىرۋشى، ياعني 31,7 پايىز. 130 باللدان جوعارى جيناعاندار - 39 تۇلەك. قازىرگى تاڭدا اپپەلياتسياعا وتىنىشتەر قابىلدانىپ جاتىر. ەرەجەگە سايكەس 13:00 گە دەيىن وتىنىشتەر قابىلدانادى»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.

ونىڭ اتاپ وتۋىنشە، جەرگىلىكتى اپپەلياتسيالىق كوميسسيا وتىنىشتەردى قاناعاتتاندىرعان جاعدايدا رەسپۋبليكالىق اپپەلياتسيالىق كوميسسياعا ناقتى شەشىم قابىلداۋ ءۇشىن جولدانادى. ناتيجەسى بۇگىنگى كۇننىڭ سوڭىنا دەيىن بەرىلەدى.

«جالپى، ۇ ب ت- نىڭ سوڭعى ناتيجەلەرى تامىز ايىندا ناقتى بولادى. ويتكەنى، بيىل نورما ەنگىزىلدى. سول نورماعا سايكەس، 25-تامىزعا دەيىن بارلىق تەستىلەۋ بارىسىنداعى بەينەجازبالارعا ارنايى باعدارلامانىڭ كومەگىمەن تالداۋ جۇرگىزەدى. بۇل رەتتە ەگەر تەستىلەۋ بارىسىندا تەست تاپسىرۋشى تىيىم سالىنعان زاتتاردى پايدالانعانى انىقتالعان جاعدايدا ولاردىڭ ناتيجەلەرى جويىلادى. سوعان وراي ەگەر ول مەملەكەتتىك ءبىلىم بەرۋ گرانتىنىڭ يەگەرى بولسا، وندا گرانت ناتيجەسى دە جويىلۋى مۇمكىن»، - دەدى ورتالىق ديرەكتورىنىڭ ورىنباسارى.

سونىمەن قاتار، ول بيىلعى ەرەكشەلىكتەرگە سايكەس، سانيتارلىق- ەپيدەميولوگيالىق جاعدايعا بايلانىستى قاتاڭ شارالار قابىلدانعانىن ايتتى.

«كەشە دەنە قىزۋى بار 2 ادام تەستىلەۋگە جىبەرىلمەدى. ولارعا باسقا كۇنى بولەك اۋديتوريادا تەست تاپسىرۋ مۇمكىندىگى ۇيىمداستىرىلادى»، - دەدى ناۋجان ديداربەكوۆا.