پرەزيدەنت جارلىعىمەن ءبىر توپ مەديتسينا قىزمەتكەرلەرى وردەن-مەدالدارمەن ماراپاتتالدى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆتىڭ جارلىعىمەن ءبىر توپ مەديتسينا قىزمەتكەرلەرى مەملەكەتتىك وردەن-مەدالدارمەن ماراپاتتالدى.

بۇل تۋرالى قازاقپارات ق ر پرەزيدەنتىنىڭ باسپا ءسوز حاتشىسى بەرىك ۋاليگە سىلتەمە جاساپ حابارلايدى.

«مەملەكەت باسشىسى قاسىم-جومارت كەمەل ۇلى توقايەۆتىڭ جارلىعىمەن ازاماتتاردىڭ دەنساۋلىعىن ساقتاۋ ءۇشىن جانكەشتى ەڭبەك ەتىپ، تىنىمسىز جۇمىس ىستەگەن مەديتسينا قىزمەتكەرلەرىنىڭ ءبىر توبى مەملەكەتتىك وردەن-مەدالدارمەن ماراپاتتالدى»، - دەدى بەرىك ءۋالي جەلىدەگى پاراقشاسىندا.

ەسكە سالساق، قازاقستاندا جىل سايىن ماۋسىم ايىنىڭ ءۇشىنشى جەكسەنبىسىندە مەديتسينا قىزمەتكەرلەرى كۇنى اتاپ وتىلەدى. سونداي-اق، مەملەكەت باسشىسى مەديتسينا قىزمەتكەرلەرىن كاسىبي مەرەكەلەرىمەن قۇتتىقتادى.