كوروناۆيرۋس بويىنشا الەمدەگى احۋال قانداي؟
ال اۆستراليا احۋالدىڭ ورشۋىنە بايلانىستى شەكتەۋ شارالارىن قايتادان كۇشەيتپەك. بريتانيادا ەكى اپتالىق كارانتين ەنگىزبەۋ ءۇشىن اۋەجاي ارقىلى ەلگە كىرگەن ازاماتتاردى اقىلى تەستىلەۋدەن وتكىزۋدە. الەم حالقىنىڭ كوروناۆيرۋسپەن كۇرەسى جايلى قازاقپارات ءتىلشىسى BBC - گە سىلتەمە جاساپ حابارلايدى.
دجونس حوپكينس ۋنيۆەرسيتەتىنىڭ مالىمەتىنشە الەمدە 8,5 ميلليون ادام كوروناۆيرۋس جۇقتىردى دەپ حابارلانعانىمەن، بۇل كورسەتكىش ايتارلىقتاي كوپ بولۋى مۇمكىن.
سەبەبى كوپ ادامدا اۋرۋ سيمپتومسىز ءوتۋى مۇمكىن. تەستىلەۋدەن وتپەي جاتقاندارى دا قانشاما. ال كوروناۆيرۋستەن كەلگەن ءولىم-ءجىتىم جاعدايى الەم بويىنشا 454 مىڭ ادامنان استى. رەسەيدە ىندەتتى جۇقتىرۋ جاعدايلارى وتكەن تاۋلىكتە 7889-عا جەتىپ، جالپى اۋىرعانداردىڭ سانى 580 مىڭعا تاياپ قالدى.
ەپيدەمياعا قاراماستان ماسكەۋدە جەڭىس شەرۋىنە قىزۋ دايىندىق جۇرگىزىلۋدە. ماسكەۋ قالاسىندا ءبىر تاۋلىكتە جاڭادان 1057 جاعداي انىقتالدى. بۇل - ءساۋىر ايىنان بەرگى ەڭ تومەندى رەكوردتىق كورسەتكىش. ءبىر تاۋلىكتە ەلدە 161 ادام كوروناۆيرۋستان قايتىس بولعان. رەسەيدە ىندەتتەن جان تاپسىرعانداردىڭ جالپى سانى - 8002.
COVID-19-دان ەم-دوم قابىلداعاننان كەيىن وتكەن تاۋلىكتە اۋرۋحانالاردان 10100 ادام شىققان. جازىلعانداردىڭ جالپى سانى 335 مىڭ ادامعا جەتتى. ۆلاديمير پۋتين ايماقتارداعى مەديتسينالىق قىزمەتكەرلەردى «كوروناۆيرۋستى باسىپ جانشۋعا» شاقىردى.
ەل پرەزيدەنتى اق حالاتتى جاندارعا ماسكەۋدەگى تاجىريبەنى نەگىزگە الۋدى ۇسىنىپ وتىر. سەبەبى رەسەيلىك استانادا ەپيدەميولوگيالىق احۋال تۇراقتالىپ كەلەدى. مەديتسينا قىزمەتكەرلەرىمەن ۆيدەوفورماتتا اڭگىمەلەسكەن پۋتين ۆيرۋسپەن كۇرەستە كوزگە تۇسكەن مەديتسينا قىزمەتكەرلەرىن وردەنمەن جانە مەدالمەن ماراپاتتاۋعا ۋادە بەردى.
برازيليا ميلليون شەگىنەن اسىپ كەتتى
COVID-19 جۇقتىرعان حالقىنىڭ سانى ميلليوننان اسقان ا ق ش- تان كەيىنگى ەكىنشى مەملەكەت - برازيليا.
جاڭادان جۇقتىرعانداردىڭ سانى بۇل ەلدە توقتايتىن ەمەس. برازيليا دەنساۋلىق ساقتاۋ مينيسترلىگىنىڭ دەرەگىنشە، سوڭعى تاۋلىكتە 54 مىڭ ادام كوروناۆيرۋس جۇقتىرىپ، رەكوردتىق ساندى كورسەتكەن. ەپيدەميا الداعى ۋاقىتتا الىس ايماقتارعا كەڭىنەن تاراپ، امازونكا ايماقتارىن شارپۋى مۇمكىن.
برازيلياداعى تاعى ءبىر وكىنىشتى رەكوردتىڭ ءبىرى: قاتارىنان ءتورتىنشى كۇن ەلدە كوروناۆيرۋستان كوز جۇمعانداردىڭ سانى 1200 ماڭايىندا تۇر. جالپى ەلدە 49 مىڭ ادام قايتىس بولعان. ەلدە كوروناۆيرۋسقا تەستىلەر سانىنىڭ جەتىسپەۋى شىنايى ستاتيستيكا رەسمي مالىمەتتەن بولەك دەگەن بولجام جاساۋعا ماجبۇرلەيدى.
ساراپشىلاردىڭ پايىمداۋىنشا، مەملەكەت اۋرۋدىڭ شىرقاۋ شەگىنەن ءالى وتە قويماعان.
اۋىرۋ دەڭگەيى ءورشىپ بارادى
اۆستراليالىق ۆيكتوريا شتاتىنىڭ بيلىگى ىندەتتىڭ تاۋلىكتىك ءوسىمى 25 ادامعا جەتكەننەن كەيىن شەكتەۋ شارالارىن قايتا ەنگىزۋگە ءماجبۇر بولىپ وتىر. شتاتتىڭ پرەمەرى دەنيەل ەندريۋس اۋرۋدىڭ قايتا ورشۋىنە وكىنىش ءبىلدىردى. ونىڭ ايتۋىنشا، ءساۋىر ايىنان بەرى جاڭا جاعدايلاردىڭ جارتىسى وتباسىنىڭ ىشىندە ءبىر-بىرىنەن جۇقتىرۋدان نەمەسە تۋعان-تۋىستاردىڭ ءبىر-بىرىمەن قارىم-قاتىناس جاساۋىنان كەلگەن.
الداعى اپتادا ۇيگە كەلەتىن قوناقتاردىڭ سانىن 20 دان بەس ادامعا دەيىن قىسقارتۋ كوزدەلگەن. ال كوشەدە ون ادامنان ارتىق جينالۋعا بولمايدى. مەيرامحانالاردىڭ ءبىر ۋاقىتتا 50 ادامدى كۇتەرلىك جوسپارى تاعى ءۇش اپتاعا شەگەرىلدى.
قازىرگى تاڭدا بۇل شتاتتاعى مەيرامحانالار 20 مەيماننان عانا قابىلداي الادى.
جاڭا زەلانديادا جاڭا ەرەجەلەر بويىنشا ەلگە كەلگەن ازاماتتار اۋرۋ بەلگىلەرى جوق بولسا دا 14 كۇن سايىن كوروناۆيرۋسقا تەست جاساۋعا مىندەتتەلەدى.
وڭتۇستىك كورەيادا كەيىنگى تاۋلىكتە 67 جاڭا جاعداي تىركەلگەن. بۇل - كەيىنگى ءۇش اپتاداعى ەڭ ۇلكەن كورسەتكىش.
قىتايدا جاڭادان جۇقتىرعانداردىڭ سانى - 27. ونىڭ تورتەۋى شەتتەن كەلگەندەر بولسا، 23 جاعدايدىڭ 22 ءى بەيجىڭدە، ال ءبىر جاعداي حەبەيدە بولعان.
Covid-19 اۋرۋىنا شالدىعۋ جاعدايى مەكسيكادا دا ءوسىپ بارادى: كەيىنگى تاۋلىكتە ول ەلدە 5030 جاڭا جاعداي تىركەلگەن. 647 ادام جان تاپسىرعان. مەكسيكادا جالپى اۋىرعانداردىڭ سانى 170 مىڭ ادام. الايدا ونداعى بيلىك جۇقتىرعانداردىڭ سانى ودان دا كوپ بولۋى مۇمكىن ەكەنىن حابارلادى.
مەكسيكادا كوروناۆيرۋستان قايتىس بولعانداردىڭ سانى 647 ادامعا جەتتى. تەستتىك رەجيمدەگى تەستتەر بريتانياداعى ءىرى اۋەجايلار ەلگە كەلەتىن جولاۋشىلاردىڭ سىلەكەيىنەن اناليز الىپ، كوروناۆيرۋستى انىقتاۋ شارۋاسىن تەستتىك رەجيمدە ەنگىزگەلى وتىر.
كوروناۆيرۋس راستالماعان جاعدايدا بۇل شارا بريتانياعا كىرەتىن ازاماتتارعا 14 كۇندىك كارانتيننەن بوساۋعا جول اشادى. تەستىلەۋدىڭ وسىعان ۇقساس جۇيەسى گونكونگتە دە ەنگىزىلۋدە. ينتەرنەت بويىنشا جازىلۋعا بولاتىن مۇنداي تەستتىڭ باعاسى - 140 فۋنت (172 دوللار). تەست ناتيجەسى 5-24 ساعات ىشىندە دايىن بولادى. تەستتىك رەجيم جاقىن ارادا باستالادى. سونىمەن بىرگە انگليادا قوناق ءۇي بيزنەسىنىڭ قىسىمىمەن ەكى مەترلىك الەۋمەتتىك قاشىقتىقتى قىسقارۋى مۇمكىن.
4- شىلدەدە انگليادا پابتار مەن مەيرامحانالار اشىلۋى كەرەك. وسىعان بايلانىستى ونداعى بيلىك ەكى مەترلىك الەۋمەتتىك قاشىقتىقتى قىسقارتپاق. جاڭا نورمانىڭ قانداي بولارى ءالى بەلگىسىز.
فرانتسيا، دانيا، قىتاي، ليتۆا سەكىلدى ەلدەردە بۇل قاشىقتىق 1 مەتر بولىپ وتىر.
